प्रधानमन्त्री, रक्षामन्त्री र प्रधानसेनापतीसँग चिनियाँ रक्षामन्त्रीको भेटवार्ता

Posted on: March 23, 2017 | views: 410

काठमाडौं ।
नेपाल भ्रमणमा रहेका चीनका रक्षामन्त्री जनरल चाङ्ग वानक्वानले आज प्रधानमन्त्री सहित रक्षामन्त्री र नेपाली सेनाका प्रधानसेनापतीसँग भेटवार्ता गरेका छन् ।

प्रधानमन्त्री निवास बालुवाटारमा भएको भेटमा प्रधानमन्त्री पुष्पकमल दाहाल र चीनिया रक्षामन्त्रीबिच द्विपक्षीय सम्बन्ध, नेपाली सेना र चिनियाँ सेनाबीचको सम्बन्ध सुदृढीकरण लागि आर्थिक सहयोग, प्रधानमन्त्रीको चीन भ्रमण लगायतका विषयमा छलफल भएको प्रधानमन्त्रीका परराष्ट्र सल्लाहाकार ऋषिराज अधिकारीले जानकारी दिए ।

भेटमा प्रधानमन्त्रीले एक चीन नीतिप्रति नेपालको दृढ समर्थन रहँदै आएको र चीनविरोधी तिब्बत र ताइवान गतिविधिको नेपालले सँधै विरोध गर्ने बताए ।

प्रधानमन्त्रीले चीनले अघि सारेको वान बेल्ट वान रोड परियोजनामा साझेदार बन्न नेपाल इच्छुक रहेको र नेपालको राजनीतिक स्थायित्व र आर्थिक विकासका लागि चिनियाँ सहयोग महत्वपूर्ण रहेको बताए ।

नेपाली सेना र चीनको जनमुक्ति सेनाबीच विकसित सम्बन्धप्रति सन्तोष व्यक्त गर्दै प्रधानमन्त्रीले रक्षामन्त्री चाङको नेपाल भ्रमणको पूर्ण सफलताको कामना गरेका थिए ।

भेटमा चिनका रक्षामन्त्री जनरल चाङ्ग वानक्वानले ताइवान र तिब्बत मामिलामा चीनप्रति नेपालको दृढ समर्थनका लागि धन्यवाद दिँदै वान वेल्ट वान रोडमा सहभागि हुने इच्छाप्रति धन्यवाद व्यक्त गरेका थिए ।

रक्षामन्त्री जनरल चाङ्गले प्रधानमन्त्री प्रचण्डको चीन भ्रमणको सफलताको कामना गर्दै नेपाल सरकार र नेपाली जनताले चीनप्रति देखाएको सदभाव र आत्मीय सम्बन्ध प्रति आभार व्यक्त गरेका थिए ।

रक्षामन्त्री खाँण र चिनियाँ रक्षामन्त्री भेट

आजै रक्षामन्त्री बालकृष्ण खाँण र चीनका रक्षामन्त्री जनरल चाङ्ग वानक्वानबीच भेटवार्ता भएको छ ।

सिंहदरवार स्थित रक्षा मनत्रालयमा भएको भेटमा नेपाली सेनालाई विपत व्यवस्थापन , विकास निर्माणका लागि आवश्यक पर्ने हेवी इक्पिमेन्ट, नेपाली सेनाको क्षमता अभिवृद्धिका लागि आवश्यक सैन्य सामग्री, सैन्य अभ्यास लगायतका विषयमा सहयोग गर्ने सम्बन्धमा छलफल भएको रक्षामन्त्री खाँडले जानकारी दिए ।

चीनका रक्षामन्त्री जनरल चाङ वानक्वान नेपालको तीनदिने औपचारिक भ्रमणका लागि आज काठमाडौ आएका हुन् ।

नेपालमा १६ वर्षपछि चिनियाँ रक्षा मन्त्रीको भ्रमण भएको हो ।

यसैगरि आज चिनियाँ रक्षामन्त्रीले नारायणहिटीस्थित नेपाली सेनाको श्री उपत्यका पृतना हेडक्वाटरको निरीक्षण गरेका छन् ।

निरीक्षणको क्रममा चीनीयाँ रक्षामन्त्रीद्वारा विनासकारी भुकम्पको दौरान नेपाली सेनासँग सहकार्य गर्दै सहयोग गरेको कुरा स्मरण गर्दै सांस्कृतिक सम्पदा जगेर्नामा नेपाली सेनाले खेलेको भुमिकाको प्रशंसा गरेका थिए ।