प्रधानमन्त्री चीन उडे

Posted on: March 23, 2017 | views: 203

काठमाडौं ।
प्रधानमन्त्री पुष्पकमल दाहाल साताव्यापी चीन भ्रमणमा आज राति त्यसतर्फ प्रस्थान गरेका छन् ।

प्रधानमन्त्री दाहाल चैत्र १२ गते शनिबार राजधानी बेइजिङ पुगेर चिनियाँ राष्ट्रपति सि जिनपिङसँग द्विपक्षीय वार्ता गर्ने कार्यक्रम छ ।

प्रधानमन्त्री पुष्पकमल दाहालले आफ्नो चीन भ्रमण दुई देशबीचको सम्बन्ध सुदृढ गर्न महत्वपूर्ण रहने बताएपनि कुनैपनि महत्वपूर्ण विषयमा वार्ता तथा सहमती नगर्ने भएपछि उनको भ्रमण उपलब्धिहिन हुने देखिएको छ ।

प्रधानमन्त्री निवास वालुवाटारमा चीन भ्रमणका सन्दर्भमा चीन उड्ने दिन पूर्व प्रधानमन्त्री र विज्ञहरुसँग सुझाव ग्रहण गर्दै प्रधानमन्त्रीले आफू मुख्यतः बोआओ सम्मेलनमा सहभागी हुन चीन जान लागेको र यस क्रममा उच्च स्तरीय भेटघाट र छलफल हुने बताए ।

प्रधानमन्त्रीले आफ्नो चीन भ्रमण मूलतः सद्भावना भ्रमण भएको जानकारी दिँदै यस क्रममा दुई देशबीच विश्वासको वातावरण बढाउने तथा नेपालको हितका विविध विषयमा छलफल हुने जानकारी दिए ।

प्रधानमन्त्रीले पूर्व प्रधानमन्त्री र विज्ञका सुझाव धेरै फलदायी रहेको बताउँदै सुझावका लागि धन्यवाद समेत दिएका थिए ।

उक्त भेटमा पूर्व प्रधानमन्त्री शेरबहादुर देउवा, माधव नेपाल, झलनाथ खनाल, पूर्व मन्त्रीहरु डा. रामशरण महत, रमेशनाथ पाण्डेसहित विज्ञहरु टंक कार्की, राजेश्वर आचार्य, राजेशकाजी श्रेष्ठ, चन्द्र ढकाल, हरिभक्त शर्मा लगायतले आफ्ना महत्वपूर्ण सुझाव दिएका थिए ।