महानिरीक्षक नियुक्तिसम्बन्धी मुद्दामा फैसला मङ्गलबार

Posted on: March 20, 2017 | views: 373

काठमाडौं ।
सर्वोच्च अदालतमा नेपाल प्रहरीका महानिरीक्षकको नियुक्ति सम्बन्धमा परेको मुद्दामा अन्तिम सुनुवाइ आज सकिएको छ ।

प्रधानन्यायाधीश सुशीला कार्की, न्यायाधीश डा। आनन्दमोहन भट्टराई, ईश्वरप्रसाद खतिवडा, अनिलकुमार भट्टराई र हरिकृष्ण कार्कीको पूर्ण इजलासमा भएको अन्तिम सुनुवाइपछि निर्णय भोलि सुनाइने भएको अदालतका प्रवक्ता महेन्द्रनाथ उपाध्यायले जानकारी दिनुभयो ।

मुद्दामा सरकारका तर्फबाट उपन्यायाधिवक्ता रेवती त्रिपाठी र सहन्यायाधिवक्ता टीकेन्द्र दाहालले बहस गर्नुभएको थियो । उहाँहरुले प्रहरी महानिरीक्षकमा बढुवा गर्ने कार्यकारी अधिकार प्रयोग गरी मन्त्रिपरिषद्ले कानुनसम्मत नियुक्त गरेको तर्क राख्नुभएको थियो ।

रिट निवेदनका तर्फबाट वरिष्ठ अधिवक्ता तुलसी भट्ट, अधिवक्ता टीकाराम भट्टराई र डा। भीमार्जुन आचार्यले कानुनी आधारबिना प्रहरी महानिरीषक नियुक्त गरिएको तर्क राख्नुभएको थियो ।

यसैबीच, नेपाल प्रहरीका नायब महानिरीक्षक प्रकाशकुमार अर्यालले पनि आफूलाई प्रहरी महानिरीक्षकमा बढुवा गर्नुपर्ने माग गर्दै अदालतमा रिट निवेदन दायर गर्नुभएको छ । वरियता क्रमले अर्याल २ नम्बरमा हुनुहुन्छ ।