प्रसिद्ध बिस्केट जात्राको तयारी सुरु

Posted on: March 19, 2017 | views: 344

भक्तपुर ।
भक्तपुरमा नयाँ बर्षको आगमनसँगै सुरु हुने प्रसिद्घ बिस्केट जात्राको तयारी सुरु भएको छ । जात्रा नजिकिंदै गएपछि गुठी संस्थान भक्तपुरले जात्राको तयारी सुरु गरेको हो ।

आठ रात नौ दिनसम्म मनाईने जात्राको लागि अत्यावश्यक मानिएको भैरब र भद्रकालीको रथ निर्माण कार्य सुरु गरिएको छ ।

संस्थान भक्तपुर कार्यालयका प्रमुख हरिप्रसाद सुवेदीले भक्तपुर नगरपालिका–११ तौमढी स्थित पाँचतले मन्दिर परिषरमा सिकर्मी नाईके लक्ष्मीप्रसाद शिलाकारको नेतृत्वमा चैत्र १ गतेदेखि तीनतले प्यागोडा शैलीमा काठैकाठको रथ निर्माण सुरु गरेको बताउनुभयो ।

जात्रामा लिंगो उठाउनका लागि संस्थानले भक्तपुरको सूर्यविनायक नगरपालिका स्थित चित्तपोलको सल्लाघारी वनबाट ५५ हात लामो दुईवटा लिंगो भक्तपुर नगरपालिका ११ भेलुखेल स्थित जात्रास्थलमा ल्याई पुर्याएको छ ।

कार्यालय प्रमुख सुवेदीले जात्राको तयारी तिब्र पारिएको जानकारी दिदै लिंगो उठाउने क्रममा भाँंचिए अर्को प्रयोग गर्ने गरि दुईवटा ल्याईएको बताउनुभयो ।

त्यसैगरि चैत्र २८ गते जात्राको सुरुको दिन रथ तान्नका लागि आवश्यक पर्ने डोरी खरिद गर्ने कार्य पनि सम्पन्न भएको जानकारी दिदै उहाँले गतवर्ष बिग्रिएका रथका बिभिन्न भागलाई मर्मत गर्ने र फेर्नै पर्ने पित्तलको छानोको केही भाग नयाँ राखिने बताउनुभयो । यसवर्ष जात्रा सञ्चालनका लागि करिब २८ लाख खर्च हुने अनुमान कार्यालयले गरेको छ ।