भारतीय हस्तक्षेप बिरुद्ध कञ्चनपुरवासी जागे, एसएसबीको दादागिरी बिरुद्ध ढुंगा प्रहार गरि बिरोध

Posted on: March 09, 2017 | views: 932

कञ्चनपुर ।
नेपाली भूमिमा निर्माण गरिएको कल्र्भट बनाउन रोक लगाउँदै नेपाली नागरिक कुट्ने भारतीय सीमा सुरक्षा फौज एसएसबीको कञ्चनपुरवासीले प्रतिकार गरेका छन् ।

नेपाली भूमिमा छिरेर एसएसबीको फौजले नेपाली नागरिकमाथि कुटपीट र धम्की दिन थालेपछि जागेका कञ्चनपुरबासीले नेपाली भूमिमा छिरेको भारतीय एसएसबी फौजलाई ढुंगामुढा गरि त्यहाँबाट धपाएका छन् ।


स्थानियवासीहरु एसएसबी र भारतीयको हेपाहा बिरुद्ध चर्को नाराबाजी सहित सिमा क्षेत्रमा बिरोध प्रदर्शन गरिरहेका छन् ।

भारतीय एसएसबी फौजलाई दशगजा क्षेत्रबाट लखेटेपछि एसएसबीको बचाउमा आएका भारतीय र नेपाली बिच सिमा क्षेत्रमा ढुंगाहानाहान भएको छ ।

आनन्दबजारस्थित नेपाली भूमिमा नेपालीहरुले कल्भर्ट निर्माण गर्न लाग्दा गुगल म्यापले भारतको भूमि देखाएको कुतर्क गर्दै एसएसबीले नेपाली नागरिकमाथि कुटपीट गरेको थियो ।

नेपाली नागरिकको नाममा रहेको जग्गा र नेपाली सिमा भित्र पर्ने भूमिमा गुगलले भारतमा देखायो भन्ने तर्क गर्दै सिमा अतिक्रमण गर्दै आएको एसएसबीले नेपालीमाथि हातपात थालेपछि स्थानिय स्वाभिमानी नेपाली त्यसको प्रतिकारमा उत्रिएका थिए ।

भारतीय सुरक्षाफौजको ज्यादतीको विरोधमा बिहीबार बिहान ९ बजे स्थानीय नेपालीहरु सीमा बन्द गराएर बिरोधमा उत्रिएका हुन् । उनीहरुले भारतीय हस्तक्षेपविरुद्ध नाराबाजीसमेत गरेका छन् ।

एसएसबीले भारतीय नागरिकलाई नेपालतर्फ ढुंगामुढा गर्न उक्साउँदै छेकेको जस्तो गर्दै आक्रमण गरिरहेको भन्दै नेपालीहरुले नाराबाजी गर्दै प्रतिकार गरिरहेका छन् । तर नेपाल तर्फ शसस्त्र प्रहरी र जनपद प्रहरीले नाराबाजी समेत गर्न रोक लगाउन भन्दै सो क्षेत्रबाट नेपालीहरुलाई हटाउने प्रयास गरिरहेको छ ।

भारतीय र एसएसबी ज्यादती बिरुद्ध उत्रिएका नेपालीहरु ठूलो संख्यामा भेला भएपछि झडप हुने देखिएपछि महेन्द्रनगरबाट समेत सो क्षेत्रमा थप सुरक्षाकर्मी लगिएको छ ।

भारतीय एसएसबीले नेपाल भारत सिमा क्षेत्रमा भारतीय नागरिकलाई नेपाली भूमि मिच्न उक्साउने र सहयोग गर्ने देखी रातारात सिमा स्तंभ भत्काउने तथा सार्ने गर्दै आएको छ भने नेपाली नागरिकमाथि कथित सुरक्षा चेकजाँचको नाममा दुख दिंदै पैसा असुल्दै कुटपीट समेत गर्दै आएको छ ।