भारतले फेरी सिमा मिच्न थाल्यो, बिराटनगरमा सिमा मिचेर चेक पोष्ट बनाउँदै

Posted on: March 07, 2017 | views: 482

मोरङ ।
सिमा मिच्ने देखी नेपालको आन्तरिक मामलामा हस्तक्षेप गर्दै आइरहेको छिमेकी भारतले फेरी विराटनगरको रानी भन्सार क्षेत्र नजि सिमा मिचेर चेकपोष्ट बनाउन थालेको छ ।

दशगजा क्षेत्रमा भारतीय पक्षले नियमविपरीत संरचना निर्माण थालेको हो ।

भारतीयले विराटनगरको वडा नम्बर २२ को दशगजा क्षेत्रमा भौतिक संरचना निर्माण गरिरहेको छ । रानी भन्सारको एक नम्बर गेटछेउमा रहेको हनुमान मन्दिर पछाडिको उक्त ठाउँमा भारतको जोगबनी भन्सार कार्यालयले चेकपोष्ट बनाउन लागेको हो ।

नेपाली सिमा मिचेर दशगजा क्षेत्रमा भौतिक संरचना बनाउन थालेपछि त्यसक्षेत्रका नागरिकले यसको बिरोध थालेका छन् ।

विराटनगर भन्सार कार्यालयको पर्खालको झन्डै २२ फिट पश्चिमतर्फ रहेको अस्थायी संरचना भत्काएर जोगबनी भन्सारले त्यतिनै पूर्वतर्फ सारेर भौतिक संरचना बनाउन लागेको हो ।

हेपाहा भारतले सिमा मिचेर भौतिक संरचना बनाउन थालेपनि नेपाल सरकारले रोक्न पहल नगर्दा जनआक्रोश बढ्दै गएको छ ।

भारतले सो ठाउँमा हाल २२ बाई २० फीटको पक्की संरचना निर्माण गरिरहेको छ ।

यसअघि  २०४४ सालमा समेत जोगबनी भन्सारले सो ठाउँमा पक्की संरचना निर्माण गर्ने प्रयास गरेपनि स्थानिय स्वाभिमानी नेपालीले त्यसको बिरोध र प्रतिकार गरेपछि भारत पछि हटेको थियो ।

जोगबनी भन्सारले उक्त ठाउँमा तीन दिनअघिदेखि नै संरचना निर्माणको काम सुरु गरेपनि जिल्ला प्रशासन थाहा नपाएझैं बसिरहेको छ ।

भारतले सिमा मिचेर जोगबनी भन्सारको सामान चेकजाँच मिसिन सहित स्थायि घर बनाउन लागेको बुझिएको छ ।