विपि राजमार्ग भासिंदा सयौं अलपत्र, हेवि गाडी प्रमुख कारण

Posted on: February 20, 2017 | views: 484

सिन्धुली ।
ठूला भार क्षमताका गाडीका कारण सडकखण्ड भासीने खतरा भएपछि त्यस्ता सवारी आवागमन रोक्न सरकारले चासो नदिंदा विपी राजमार्ग अन्तर्गत खुर्कोट नेपालथोक सडक खण्डमा पर्ने सिन्धुलीको सित्तलपाटी गाविस–९ बेनीमा सडक भासएर गएको छ ।

अघिल्लो सरकारका बिमलेन्दै निधी यातायात मन्त्री रहेकै बेलामा स्थानीय समुदाय र आफ्नै मन्त्रालयका इञ्जिनीयरले समेत हेभी गाडी चलाउन नदिन सुझाव दिएपनि मन्त्री निधिले त्यसको बेवास्ता गर्दा आज सडक भासिएको हो ।

सडक भासिएर पहिरो जाँदा राजधानीबाट पुर्व जाने र आउने गाडीहरु रोकिंदा सयौं यात्रु अलपत्र परेका छन् ।

भुकम्पक कारण चर्किएको उक्त सडक खण्ड हेभी गाडीहरुको निरन्तरको आवागमनले थप चर्कन थालेको थियो । पहिरोले करिब २० मिटर सडक सुनकोशीमा पुगेको छ ।

गएराती खसेको पहिरोका कारण बाटो अवरुद्ध हुँदा, सिन्धुली, रामेछाप, ओखलढुंगा, उदयपुर, खोटाङ्ग तथा तराईका जिल्लाहरुमा चल्ने गाडीहरु अवरुद्ध हुन पुगेका छन् ।




तत्काल सडक सुचारु गर्ने अवस्था नरहेको भन्दै सिन्धुली प्रहरीले बैकल्पीक बाटो अपनाउन आग्रह गर्दै सडक मर्मत र सडक सुचारुको लागि जिल्लामा छलफल भइरहेको जानकारी दिएको छ ।

राजधानीलाई पूर्वी तराइसँग जोड्ने विपी राजमार्ग जापान सरकारको अनुदानमा निर्माण भएको हो ।

राजधानीबाट बनेपा, सिन्धुली, बर्दिबास जोड्ने विपी राजमार्ग २०५२ सालमा निर्माण सुरु गरिएको थियो । यसलाई काठमाडौं(पूर्वी तराई जोड्ने वैकल्पिक राजमार्गका रुपमा लिइएको छ ।

एक सय ६० किलोमिटर लम्बाई रहेको यो राजमार्ग करिव २० वर्षको अवधिमा निर्माण सम्पन्न भएको हो । यो सडक खण्ड सुशील कोइराला प्रधानमन्त्री रहेका बेलामा जापान सरकारले नेपाललाई हस्तान्तरण गरेको थियो ।

२६ अर्ब जापानी येन लगानी भएको बताइएको सडक जेपालको उदाहरणीय राजमार्गको रुपमा हेर्न गरिन्छ ।