६७ औं प्रजातन्त्र दिवस, प्रजातन्त्रको उमेर बढेपनि जनतामा अनुभुती बढेन

Posted on: February 18, 2017 | views: 381

काठमाडौं ।
व्यक्तिको उमेरसँग दाँज्ने हो भने ६७ बर्षको उमेर परिपक्व र बुढ्यौली तर्फ ढल्कँदो उमेर हो । तर वादको हिसाबले प्रयोग र अनुभुतीमा नेपालमा ६७ औं प्रजातन्त्र दिवस मनाईरहँदा जनताले प्रजातन्त्रको वास्तविक अनुभुती गर्न पाइराखेका छैनन् ।

परिपक्व प्रजातान्त्रीक प्रणालीमा देश अघि बढ्नुपर्ने यो अवस्थामा अल्लारे उमेरमा जस्तै प्रजातन्त्रको प्रयोग र परिभाषा राजनीति गर्नेहरुले आफुखुसी गरिरहेका छन् ।

प्रजातान्त्रीक, गणतान्त्रीक, राजावादी र देश टुक्राउ खोज्ने कथित क्षेत्रियवादीहरुसमेत आफ्ना स्वार्थका कुरालाई सत्य सावित गर्न प्रजातन्त्रकै फुर्को जोड्न पछि पर्दैनन् ।

२००७ साल फागुन ७ गते प्रजातन्त्र स्थापना भएको सम्झनामा विगतमा जस्तै औपचारिकताको लागि विभिन्न कार्यक्रम गरेर प्रजातन्त्र दिवस मनाइंदैत छ तर यसको सुखानुभुती जनताको दैनिकिसँग खास जोडिन सकेको छैन ।

एक सय चार वर्षीय जहानियाँ राणा शासनको विरुद्धमा जनताले आन्दोलन गरी राणा शासकले जनतासमक्ष घुँडा टेक्न बाध्य बनाएको सम्झना गरिएपनि त्यो प्रजातन्त्रलाई त्यसपछिका सत्ता सम्हाल्ने यिनै दलहरुले दलिय र नेतागत स्वार्थ हुँदै कार्यकर्तामुखी मात्र बनाउँदा जनताले प्रजातान्त्रीक सरकारको रुपमा प्रधानमन्त्रीका खातहरु त पाइरहेका छन् तर दैनिक अनुभुतीका प्रजातान्त्रीक शासन व्यवस्थाको सुखानुमुती गर्न पाएका छैनन् ।

प्रजा परिषद् नामक राजनीतिक दल भूमिगत रुपमा स्थापना गरी प्रजातन्त्र स्थापनाका लागि जनतामा जागरण ल्याएको अभियोगमा शुक्रराज शास्त्री, दशरथ चन्द, धर्मभक्त माथेमा र गङ्गालाल श्रेष्ठसहित अनेक ज्ञात अज्ञात शहिदका नाममा सलामी दिइंदै आएपनि पछिल्लो समय दलीय स्वार्थमा मारिएका अपराधि समेतलाई शहिदको बिल्ला भिराएर १० लाख बाँड्ने संस्कारले प्रजातन्त्रका लागि ज्यान आहुती गर्ने सच्चा शहिदको समेत अपमान हुन थालेको छ ।