पोखरेलले पाए निमित्त आइजिपीको जिम्मेवारी

Posted on: February 14, 2017 | views: 543

काठमाडौं ।
वरिष्ठता र कार्यक्षमता विपरित काँग्रेस सभापती शेरबहादुर देउवाको दवावमा प्रहरी महानिरिक्षक बनाइएका जयबहादुर चन्दलाई सर्वोच्चले पदमा बहाल हुन नदिएपछि सरकारले चोरबाटो अपनाउँदै निमित्त आइजिपीको जिम्मेवारी दिनेशचन्द्र पोखरेललाई दिएको छ ।

नियमावलीले प्राविधिक तर्फका अतिरिक्त महानिरीक्षक 'एआइजी' डा. दिनेशचन्द्र पोखरेललाई निमित्त आइजिपी नियुक्त गर्न नमिल्ने भएपछि नियमावलीले परिवर्तन गरेर सरकारले उनलाई सो पदमा नियुक्त गर्ने निर्णय गरेको छ ।

नियमानुसार वरियताका आधारमा बढी अंक ल्याउने मुनिको प्रहरी अधिकृतलाई कायममुकायम तोक्नुपर्ने थियो। यस आधारमा डिआइजी नवराज सिलवाल स्वतः कार्यवाहक आइजिपी बन्ने स्थिति आएपछि मन्त्रिपरिषदले सिलवाललाई आइजीपी हुन नदिन यस्तो गरेको हो ।

प्रहरी संगठनभित्र राजनीतिक हस्तक्षेप वढाउँदै सरकारले अपर्झट विना औचित्य नियमावली आफुखुसी फेर्दै निमित्त आइजीपी बनाएको छ ।

प्रधानमन्त्री निवास बालुवाटारमा सोमबार साँझ बसेको मन्त्रिपरिषद बैठकले उक्त निर्णय गरेको हो । प्रचलित नियमावलीले प्राविधिक तर्फका एआइजीलाई निमित्त पद दिन रोक लगाएको थियो ।

यो सँगै आइजिपी उपेन्द्रकान्त अर्याल र ९ जना एआइजीले सोमबारबाट अवकाश पाएका छन् ।

अर्याल सोमबार साँझै पोखरेललाई जिम्मेवारी हस्तान्तरण गर्दै बिदा भएका छन् ।