आइजीपी रोल नम्वर १ सिलवाल सेवामा उत्कृष्ठ, जयबहादुर चन्द देउवाका एकनम्वर, निर्णय दाहालको हातमा

Posted on: February 09, 2017 | views: 1077

काठमाडौं ।
काँग्रेस सभापती शेरबहादुर देउवाले बरिष्ठता तथा चरित्रका आधारमा समेत अब्बल मानिएका नवराज सिलवालको ठाउँमा जयबहादु चन्दलाई नेपाल प्रहरीको महानिरिक्षकमा नियुक्त गर्न दबाव दिएका छन् ।

काँग्रेस निकट रहेको र देउवाको क्षेत्रको आधारमा सुदुरपश्चिमको भन्दै देउवाले गृहमन्त्री बिमलेन्द्र निधिलाई चन्दलाई आइजीपीमा नियुक्त गर्न चर्को दबाव दिएका छन् ।

नेपाल प्रहरीको महानिरीक्षक कसलाई बनाउने भन्नेबारे प्रधानमन्त्री पुष्पकमल दाहालले आजै मन्त्रीपरिषद बैठकबाट निर्णय गराउने तयारी गरेकोमा देउवासँग बिवाद भएपछि आज बस्ने मन्त्रिपरिषद बैठकनै स्थगित गरिएको छ ।

यही साता अवकाश पाउन लागेका प्रहरी महानिरीक्षक उपेन्द्रकान्त अर्यालका ठाउँमा बरियताका आधारमा डीआइजी नवराज सिलवाललाई आइजीपी बनाउनुपर्ने अडानमा प्रधानमन्त्री दाहाल देखिएका छन् ।

प्रहरी संगठनभित्र पार्टीले हस्तक्षेप गर्न नहुने र संगठनमा अहिलेसम्म रहेको व्यवसायिकता एवं चेन अफ कमाण्डलाई बिगार्न नहुने प्रधानमन्त्रीले देउवालाई बताएको बुझिन्छ ।

प्रहरीको चेन अफ कमाण्डलाई ख्याल गर्दै सिलवाललाई नै आइजी बनाउनुपर्ने देउवाले बताए पनि देउवाले चाहिँ तेस्रो बरियतामा रहेका बिवादास्पद छविका डीआइजी जयबहादुर चन्दलाई आइजीपी बनाउन प्रधानमन्त्रीलाई दबाव दिएका छन् ।

सिलवाललाई आइजीपी बनाउन प्रस्ताव आए मन्त्रिपरिषद बैठकमा बिरोध गर्न आफ्ना मन्त्रीलाई निर्देशन समेत दिएका देउवाले दोस्रो बरियताका प्रकाश अर्याललाई आइजीपी बनाउन गरिएको दाहालको प्रस्ताव समेत नमानेको बताइएको छ ।

विहीबार बिहानै बालुवाटार पुगेका मुख्यसचिव सोमलाल सुवेदीलाई प्रधानमन्त्रीले बैठक स्गथित भएको सूचना मन्त्रीहरुलाई दिन भनेपनि देउवासँग प्रधानमन्त्रीको विवाद थप चुलिएको प्रष्ट भएको छ ।

नेपाली कांग्रेसका नेताहरुले विगतमा प्रहरीको सरुवा र बढुवामा पैसाको चलखेल गर्ने गरेको समाचारहरु बाहिर आएका थिए । यसपटक बरियतानै मिचेर नेतृत्व फेर्न कस्सिएको काँग्रेस नेतृत्वले यो पटक कत्तिको आर्थिक लेनदेन गरेको छ अहिलेनै खुलिसकेको छैन ।

काँग्रेस निकट तथा क्षेत्रगत आधारमा आफ्नो क्षेत्रका चन्दलाई आइजीपी बनाउन पाए छिट्टै गर्ने भनिएको स्थानिय तथा संसदीय चुनाव आफ्नो पक्षमा पार्न सकिने लोभले देउवाले चन्दलाई काखि च्यापेका छन् । यसमा चन्दले समेत आफुलाई आईजीपी बनाए जुनसुकै सहयोग गर्ने बताएका कारण देउवा उनलाई आइजीपी बनाउन मरिहत्ते गरेर लागेको प्रहरीका उच्च अधिकारीहरुले नै बताउने गरेका छन् ।

देशभरिका २६ डीआइजीमध्ये नवराज सिलवाल पहिलो बरियतामा छन् भने दोस्रोमा प्रकाश अर्याल र तेस्रोमा जयबहादुर चन्द छन् । केही समय अघि मात्र नेपाल प्रहरीको आइजीपी बन्नकै लागि भारतीय आशिर्वाद लिन भारत समेत गएका चन्द नेपाल प्रहरीभित्र समेत आर्थिक तथा विभिन्न गैर कानुनी काण्डमा मुछिएका विवादास्पद व्यक्ति हुन् ।