श्रम अनुमतिपत्र आवेदन भोलीबाट अनलाइनबाटै

Posted on: January 31, 2017 | views: 497

काठमाडौं ।
सेवाग्राहीको चर्को दबाव र विभिन्न मिडियाले श्रम अनुमतिपत्र अनलाइनमा नगरि सेवाग्राहिलाई दुख दिएको बारे समाचार प्रकाशित गरेपछि भोलीबाट यो सेवा अनलाइनबाट हुने भएको छ ।

भोलि बुधबारदेखि सर्वसाधारण सबैले श्रम इजाजतको आवेदन अनलाइनबाटै गर्न सक्ने भएका छन् ।

श्रम तथा रोजगार मन्त्रालयले गत पुस ३ गतेदेखि परीक्षणको रुपमा अनलाईनबाट पूर्व श्रम स्वीकृति दिन सुरु गरेको थियो ।

वैदेशिक रोजगार व्यवसायी कम्पनीहरुले पूर्व श्रम स्वीकृति लिने काम अनलाइनबाटै गर्दै आएका छन् । अनलाइन सेवाको प्रभाव राम्रो देखिएकोले  अब श्रम इजाजत लिने कार्य अनलाईनबाट नै हुने भएको हो ।

पुष ३ गतेदेखि नै वैदेशिक रोजगार विभागले संस्थागत रुपमा श्रम इजाजतको आवेदन अनलाईनबाट नै गर्न पाउने व्यवस्था गरेको थियो ।

यसको प्रभाव सकरात्मक देखिएकोले अब व्यक्तिगत रुपमै अनलाईनबाट श्रम इजाजत प्राप्त गर्न सक्ने व्यवस्था सुरु गर्न लागिएको श्रम तथा रोजगार मन्त्रालयका सहसचिव एवं प्रवक्ता गोविन्दमणि भुर्तेलले बताए ।

कामदारहरुले वैदेशिक रोजगार विभागको अनलाईन फाराममा आफू जान लागेको देशसहित त्यहाँको कम्पनीबाट आएको माग पत्र, भिसा लगायतका कागजात, पासपोर्टको प्रतिलिपिसहित आवश्यक कागजात अनलाइनमा अपलोड गरेर र त्यसैका आधारमा सम्बन्धित व्यक्ति कुन देशमा, कुन कम्पनीमा, के कामका लागि जान श्रम इजाजत मागेको हो लगायतका अनलाइन विवरण विभागले प्राप्त गर्छ र त्यहि अनुरुप श्रम इजाजतको प्रक्रिया अगाडि बढाउने छ ।

श्रम तथा रोजगार मन्त्रालयको तथ्याँक अनुशार श्रम स्वीकृतिको आवेदन दिन श्रम कार्यालयमा दैनिक करिब १५ सय कामदार जाने गरेका छन ।

यस्तो प्रकारको अनलाईन प्रणालीबाट श्रम इजाजतको प्रक्रियाका लागि कामदारलाई एउटै कामका लागी बारम्बार विभागको कार्यालय धाउनुपर्ने र घण्टौ लाइन बस्नुपर्ने सास्ती घट्ने र दलालको ठगी नियन्त्रण हुने अपेक्षा गरिएको छ ।

पछिल्लो समय यस बिषयमा सिधा कुरा जनतासँग टेलिभिजन कार्यक्रममार्फत रवि लामिछानले निरन्तर समचार प्रकाशित गरेपछि यसले गति पाएको थियो ।