विद्युतका पर्याय बनेका कुलमानको समर्थनमा राजधानीमा प्रदर्शन हुँदै

Posted on: December 17, 2016 | views: 438

२ पुस, काठमाडौं ।
नेपाल विद्युत प्राधिकरणको पिद्युत चुहावट र कालोबजारीबाट मुक्त गर्दै लोकसेडिगं न्यून गर्दै लगेका कार्यकारी निर्देशक कुलमान घिसिङको समर्थनमा शनिबार राजधानीमा प्रदर्शन हुन लागेको छ ।

‘भ्रष्टहरुको जालो तोड्दै लोडसेडिङको अन्त्य गरौँ, कमिसनखोरको पञ्जाबाट प्राधिकरण मुक्त गरौं’ भन्ने नारासहित प्रदर्शन हुन लागेको हो ।

उज्यालो नेपालको आयोजना र विवेकशील नेपाली दलको व्यवस्थापनमा र्‍यालीसहित प्रदर्शन गर्न लागिएको हो ।

भृकुटी मण्डपबाट दिउँसो एक बजेपछि सुरु हुने र्‍याली खुल्लामञ्च जाने र विशेष साँस्कृतिक कार्यक्रममा परिणत हुने विवेकशील नेपाली समाजले जनाएको छ ।

विद्युत प्राधिकरणको कार्यकारी निर्देशक नियुक्त भएलगत्तै लोडसेडिङ हटाएर घिसिङ चर्चामा आएका छन् । तर, उनका विरोधीहरुले घिसिङविरुद्ध षडयन्त्र गरिरहेको र देशलाई पुनः अन्धकारमा धकेल्ने चलखेल भइरहेको बताइंदै आएको छ ।

यसअघि लोडसेडिङ मुक्त अभियानमा बाधा पुर्‍याएको भन्दै ऊर्जा मन्त्रालयले विद्युत प्राधिकरणका तीन जना सञ्चालकसँग स्पष्टिकरण मागेको थियो ।