'भारतीय राजदूतलाई देश निकाला गर'

Posted on: December 05, 2016 | views: 625

२० मंसिर, काठमाडौं ।
नेपालको अन्तरिक राजनीतिमा हस्तक्षेप गर्दै भारतसँग जोडिएका तराईका नेताहरुलाई भोज खुवाउँदै उक्साउँदै आएका भारतीय राजदूत रन्जित रे लाई देश निकालाको माग गर्दै काठमाडौंमा प्रदर्शन भएको छ ।

सरकारले संसदमा दर्ता गराएको संविधान संशोधन प्रस्ताव पारित गराउन विभिन्न दलका नेताहरुलाई भेट्दै दवाव दिन थालेपछि रे लाई फिर्ता पठाउन माग गर्दै भारतीय राजदूतावास अगाडी प्रदर्शन भएको छ ।

विभिन्न विद्यार्थी संगठन तथा स्वस्फूर्त रुपमा उपस्थित भएका युवाहरुले पुष्पकमल दाहाल सरकार भारतको इशारामा चलेको भन्दै प्रधानमन्त्री प्रचण्डको राजीनामा समेत माग गरेका छन् ।

नेपाल सरकारले ल्याएको संविधान संशोधन प्रस्ताव महत्वपूर्ण कदम भएको भन्दै भारतीय राजदूतावासले विज्ञप्ती नै निकालेपछि यसको बिरोध भइरहेको छ ।

नेकपा एमाले निकट विद्यार्थी र युवा संगठन समेतको उपस्थितिमा भएको प्रदर्शनमा सहभागी सयौं युवाहरुले रञ्जित रे देश छोड, भारतीय राजदूत मुर्दावाद, भारतीय हस्तक्षेप मुर्दावाद, राष्टघाती प्रधानमन्त्री राजिनामा दे जस्ता नारा लगाएका थिए ।

राष्ट्रिय झण्डासहित विरोध प्रदर्शन गर्न दूतावास अगाडि बढेको जुलुशलाई प्रहरीले लैनचौर चोकमै रोकेको थियो ।

पुष्पकमल दाहाल सरकारले भारतीय दूतावासको अनुरोधमा दूतावास वरपर निषेधित क्षेत्र घोषणा गरेर शान्तिपूर्ण प्रदर्शनमा समेत रोक लगाएको छ ।