प्रधानमन्त्रीले आफ्नो पनि सम्पत्ती देखाएनन्, मन्त्रीलाई पनि लुकाउन लगाए

Posted on: November 15, 2016 | views: 478

३० कार्तिक, काठमाडौं ।
आफुलाई सर्वहारा बर्गका नेता बताउने प्रधानमन्त्री पुष्पकमल दाहाल प्रचण्डले आफ्नो सम्पत्ती विवरण लुकाएका छन् । यती मात्र हैन प्रधानमन्त्रीले आफ्ना सबै मन्त्रीका सम्पत्ती समेत लुकाउन लगाएका छन् ।

प्रचण्ड नेतृत्वको मन्त्रिपरिषदले प्रधानमन्त्रीसहित मन्त्रीहरुको सम्पत्ति विवरण सार्वजनिक नगरि जनताको अपमान गरेको हो ।

३ सय दिनको काम सयदिनमा गरेको भाषण गरेपनि आफ्नो र मन्त्रीहरुको सम्पत्ती समेत सार्वजनिक नगरेका प्रधानमन्त्रीले मन्त्रीहरुलाई समेत सम्पत्ती विवरण सार्वजनिक गर्न नभनेको खुल्न आएको छ ।

सरकार गठन भएको सय दिन वितिसक्दासमेत प्रधानमन्त्री र मन्त्रीहरुले आफ्नो सम्पत्ति सार्वजनिक गरेका छैनन् ।

प्रधानमन्त्री सहित मन्त्रीहरुले कार्यालयमा आफ्नो सम्पत्ति विवरण पेश गरेपनि प्रधानमन्त्रीले नै सार्वजनिक नगरेको पाइएको छ ।

यसअघिका सरकारले मन्त्रिपरिषद बैठक पछि मन्त्री र प्रधानमन्त्रीहरुको सम्पत्ति विवरण प्रधानमन्त्री कार्यालयमा प्राप्त हुनासाथ कार्यालयको वेभसाइटमार्फत सार्वजनिक गर्दै आएको थियो ।
तर प्रचण्ड नेतृत्वको सरकारले भने कुनैपनि मन्त्रीको सम्पत्ति विवरण सार्वजनिक नगरि मन्त्रीहरुलाई आर्थिक श्रोत अपचलनमा सहयोग गरेको आरोप लाग्दै आएको छ ।

प्रधानमन्त्री कार्यालयका प्रवक्ता दामोदर रेग्मीका अनुसार सबै मन्त्रीले सम्पत्ति विवरण बुझाएका छन् तर प्रधानमन्त्री पुष्पकमल दाहाल प्रचण्डले सार्वजनिक गर्न भनेका छैनन् भने मन्त्रीपरिषदमा यसबारेमा छलफल वा निर्णय समेत केही भएको छैन ।

कानुनतः कुनैपनि व्यक्तिले सार्वजनिक पद धारण गरेपछि ६० दिन भित्र आफ्नो र आफ्नो परिवारको नाममा रहेको सम्पत्ति विवरण सार्वजनिक गर्नुपर्नेहुन्छ । साथै  हरेक आर्थिक बर्षको अन्त्यमा पुनः सम्पत्ति विवरण सार्वजनिक गर्नुपर्ने नियम रहेको छ ।

यसअघि गठन भएका हरेक सरकार गठन भएको १५ दिनभित्र प्रधानमन्त्रीसहित मन्त्रीहरुको सम्पत्ति विवरण सार्वजनिक गर्दै आएका थिए ।
यसपटक प्रधानमन्त्री दाहालले नै सम्पत्ति लुकाएर सार्वजनिक गर्न नचाहेको प्रष्टिदै गएको छ ।