मुखर्जीको नेपाल भ्रमण, प्रचण्डले मुखर्जीलाई मानार्थ उपाधि दिए (विस्तृतमा)

Posted on: November 03, 2016 | views: 467

१८ कार्तिक, काठमाडौं ।
नेपालको तीनदिने भ्रमणका क्रममा रहेका भारतका राष्ट्रपति प्रणव मुखर्जी आज विभिन्न कार्यक्रममा सहभागी भएका छन् ।

राष्ट्रपति मुखर्जीलाई काठमाडौं विश्वविद्यालयले एक विशेष दिक्षान्त समारोहमा मानार्थ विद्यावारिधि प्रदान गरेको छ ।

समारोहमा काठमाण्डौं विश्वविद्यालयका कुलपति एवं प्रधानमन्त्री पुष्पकमल दाहालले राष्ट्रपति मुखर्जीलाई मानार्थ विद्यावारिधि प्रदान गरे ।

राष्ट्रपति मुखर्जीले सार्वजनिक सेवा, क्षेत्रीय सहयोग र अन्तर्राष्ट्रिय सम्बन्धमा पुर्याएको महत्वपूर्ण योगदान स्वरुप उनलाई मानार्थ विद्यावारिधि प्रदान गरेको विश्वविद्यालयले जनाएको छ ।

समारोहमा शिक्षामन्त्री एवं विश्वविद्यालयका सहकुलपति धनीराम पौडेलले मानार्थ विद्यावारिधिको प्रमाणपत्र वाचन गरेका थिए ।

विशेष दिक्षान्त समारोहलाई सम्बोधन गर्दै भारतीय राष्ट्रपति मुखर्जीले आफुलाई गरिएको सम्मान मानवजातिको उत्थानमा समर्पित गर्ने बताए । उनले सिर्जनशीलता, अनुसन्धान र विकासलाई केन्द्रमा राखेर अघि बढेमा कुनै पनि संस्थाले उत्कृष्टता प्राप्त गर्न सक्ने पनि बताए ।

राष्ट्रपति मुखर्जीले नेपाल भारतबीचको सम्बन्ध एक दुई वर्ष वा एक दुुई दशकको नभएर शताब्दीयौ देखि रहिआएको भन्दै आफुलाई सम्मान गरिएकोमा भारतीय जनताका तर्फबाट धन्यबाद दिए ।

राष्ट्रपति मुखर्जीलाई मानार्थ विद्यावारिधि प्रदान गर्दै प्रधानमन्त्री एवं विश्वविद्यालयका कुलपति दाहालले विश्वविद्यालयको कुलपतिको नाताले मानार्थ विद्यावारिधि प्रदान गर्न पाएकोमा खुशी व्यक्त गरे ।

उनले भूगोल, इतिहास र संस्कृतिले नेपाल भारत सम्बन्धलाई विशिष्ट बनाएको र यस क्षेत्रमा ठूला ठूला दार्शनिक, विद्धवान तथा अनुसन्धानकर्ता जन्मिएको स्मरण गर्दै यो दुई देशको सम्बन्धमा कोशेढुंगा भएको बताए ।

प्रधानमन्त्री दाहालले यस क्षेत्रकै उच्च व्यक्तित्वको रुपमा रहेका राष्ट्रपति मुखर्जीको ज्ञान, बुद्धि र विवेकबाट नेपाली जनता लाभान्वित हुने धारणा व्यक्त गरे ।

समारोहमा विश्वविद्यालयका उपकुलपति डा. रामकण्ठ मकाजुले नेपाल र भारतका जनताबीचको सम्बन्ध सुमधुर र बलियो रहेको बताए ।

यसैगरी भारतका राष्ट्रपति प्रणव मुखर्जीलाई काठमाण्डौ महानगरपालिकाले आज नागरिक अभिनन्दन गरेको छ ।

राष्ट्रपति मुखर्जीलाई काठमाण्डौ महानगरपालिकाको तर्फवाट महानगरपालिका कार्यकारी अधिकृत रुद्र सिह तामाङले अभिनन्दन पत्र वाचन गरि हस्तान्तरण गरे ।

अभिनन्दन समारोहलाई सम्वोधन गदैैै राष्ट्रपति मुखर्जीले शान्ति,स्थायित्व र विकासको मार्गमा नेपाल अघि वढेकोमा भारत खुसी रहेको र त्यसमा सधै नै भारतको सहयोग रहने बिचार राखे ।

राष्ट्रपति मुखर्जीले नेपाल र भारत सरकार मात्रै नभइ जनता जनतावीचको सम्वन्ध विश्वकै लागि उदाहरणिय रहेको वताए ।

उनले सास्कृतिक,धार्मिक एवं खुल्ला सिमानाका कारण दुई देशका जनतावीचको सम्वन्ध थप प्रगाढ र मैत्रिपूर्ण भएको वताए ।

समारोहमा राष्ट्रपति मुखर्जीलाई काठमाण्डौ महानगरपालिकाको साँचो पनि हस्तान्तरण गरिएको थियो ।

यसअघि नेपालको राजकीय भ्रमणमा रहनुभएका भारतका राष्ट्रपति प्रणव मुखर्जीले आज विहान पशुपति गएर आराध्यदेव भगवान पशुपतिनाथको विशेष पूजाअर्चना गरेका थिए ।

राष्ट्रपति मुखर्जीले मन्दिर परिसरमा अवस्थित बासुकी, गणेश, सूर्य, नारायण, भैरव, नवग्रह लगायत अन्य देवीदेवताको पनि पूजाअर्चना गरेका थिए ।

भारतीय राष्ट्रपति मुखर्जीले पशुपतिनाथको परिक्रमा गरी गर्भगृहबाट प्रवेश गरेर विधिपूर्वक पञ्चामृत स्नान र रुद्रीपाठसहित सवालाख बत्ती बालेर देवाधिदेव महादेवको विशेष आराधना गरेका हुन् ।

राष्ट्रपतिद्वारा विशेष पूजा सम्पन्न भएपछि मूलभट्टले फूलप्रसाद प्रदान दिएका थिएभने कोषका अध्यक्षसमेत रहेका मन्त्री जीवनबहादुर शाहीले कोषका तर्फबाट भारतीय राष्टपति मुखर्जीलाई उपहार दिएका थिए ।

त्यस अवसरमा पशुपतिनाथ मन्दिरको आगन्तुक पुस्तिकामा हस्ताक्षर गर्दै मुखर्जीले पशुपति मन्दीरमा आएर आफुले प्रशन्नता र आनन्दको अनुभुति गरेको र पशुपति क्षेत्रमा रहेको घाटको पुनर्निमार्ण र नवनिर्माणमा सहायता गर्ने प्रतिद्धता व्यक्त गरे ।
स्मरणीय छ तीन बर्षअघि पशुपतीनाथ दर्शनमा आएका भारतकै प्रधानमन्त्री नरेन्द्र मोदीले १० करोड रुपैयाँ सहयोग गर्ने घोषणा गरेपनि अहिलेसम्म एक रुपैयाँ दिएका छैनन् ।

भारतका राष्टपति मुखर्जी र पूर्ब राष्ट्रपति डा. यादबबीच भेटबार्ता

आजै भारतका राष्ट्रपति मुखर्जी र पूर्ब राष्ट्रपति डा. रामबरण यादब बीच काठमाडौमा भेटबार्ता भएको छ ।

भारतीय राष्ट्रपति बस्दै आएको होटल हायातमा भएको भेटबार्तमा दुई देशको आपसी सम्बन्ध र तराई मधेशको समस्याका बिषयमा कुराकानी भएको थियो ।

पूर्व प्रधानमन्त्री नेपाल र राष्ट्रपति मुखर्जीबीच भेट

त्यसैगरी भारतका राष्ट्रपति मुखर्जीसँग पूर्व प्रधानमन्त्री एंव नेकपा (एमाले) का नेता माधवकुमार नेपालले आज शिष्टाचार भेट गरे ।

भेटमा उनिहरुबीच दुई मुलुकको आपसी हित र पारस्परिक चासोका विषयमा कुराकानी भएको थियो ।