ग्रेटर नेपाल अभियन्ता फणिन्द्र नेपाल सहित पाँचजनालाई सार्वजनिक मुद्दा !

Posted on: November 03, 2016 | views: 759

१८ कार्तिक, काठमाडौं ।
कुनै समय भारतीय बिरोध गर्न उनै फणिन्द्र नेपालहरुको साथ खोज्ने पुष्पकमल दाहाल प्रचण्ड सरकारले भारतीय राष्ट्रपति प्रणव मुखर्जी नेपाल आउँदा कालो झण्डा देखाएको भन्दै उनैलाई पक्रेर सार्वजनिक मुद्दा लगाउने तयारी गरेको छ ।

प्रहरीले ग्रेटर नेपालका अध्यक्ष रहेका अभियन्ता फणिन्द्र नेपाल, अधिकारकर्मी शारदा भुसाललगायत पाँचजनालाई पक्राउ गरेको छ ।

बुधबार नेपाल भ्रमणमा आएका भारतीय राष्ट्रपति मुखर्जीको चौतर्फी चर्को बिरोध भइरहँदा कालो झण्डा देखाउन नेपाल नेतृत्वको समूह त्रिभुवन अन्तराष्ट्रिय विमानस्थलको गेटमा पुग्न नपाउँदै पक्राउमा परेको हो ।

प्रहरीले नेपालसहित चार जनालाई पक्राउ गरेको छ । पक्राउ पर्नेमा अध्यक्ष नेपालसँगै तिलक बोहोरा, योगेश बराल र राम खड्का रहेका छन् । उनिहरुलाई बालाजु प्रहरी बृत्तमा राखिएको छ ।

त्यस्तै मुखर्जीको भ्रमणको विरोधमा कालो कपडा लगाएर माइतीघर मण्डलामा प्रदर्शन गरेको भन्दै अधिकारकर्मी शारदा भुसाललाई पनि प्रहरीले पक्राउ गरेको छ ।

पक्राउ परेकाहरुलाई सरकारको निर्देशन अुनसार सार्वजनिक मुद्दा चलाइने महानगरीय प्रहरी परिसरले जनाएको छ ।

भुसालले भने हिरासतमै रहेको अवस्थामा अनसन थालेकी छन् । पक्राउ पुर्जी नदिएको तथा उचित व्यवहार नभएको भन्दै भुसालले गए राति ८ बजे अनसनको घोषणा गरेकी हुन् ।

प्रहरीले यसअघि ग्रेटर नेपालका संयोजक फणिन्द्र नेपालको घरमा दुईपटक छापा मारेको थियो ।

भारतीय राष्ट्रपति प्रवण मुखर्जीको नेपाल भ्रमणको विरोध गर्दै कालोझण्डा देखाउने तयारी गरेपछि प्रहरीले फणिन्द्र नेपाल सहितका ग्रेटर नेपाल आवद्धहरूलाई खोजतलास गरेको थियो ।

आफ्नो घरमा भारतीय दुतावासको निर्देशनमा प्रचण्ड सरकारले दुईपटक छापा मारेको भन्दै पक्राउ अघिनै अभियन्ता नेपालले बिरोध गरेका थिए । यसका बावजुद पनि नेपालले मुखर्जीको भ्रमणको बिरोध सहित कालो झण्डा देखाएकोमा उनको देशभक्त नेपालीहरुले खुसी र बधाई सहित उनको बिना सर्त तत्काल रिहाई गर्न माग गरेका छन् ।