नेपाली भूमिमा भारतीयको प्रदर्शनले वीरगन्ज नाका ठप्प

Posted on: October 30, 2016 | views: 219

१४ कात्तिक, काठमाडौं । भारतीयहरुले शुक्रबार वीरगन्ज रक्सौल नाका ठप्प पारेका छन् ।

वीरगन्ज उपमहानगरपालिका कार्यालयले नगरक्षेत्रबाट संकलित फोहर दसगजा क्षेत्रमा फालेर वातावरण प्रदुषित गरेको भन्दै उनीहरुले मितेरी पुलमा प्रदर्शनसहित वीरगन्ज रक्सौल नाका दुई घण्टा ठप्प पारेका आजको अन्नपूर्णमा समाचार छ ।

भारतीयले दसगजा क्षेत्रमा पर्ने नेपाली मूमिमै प्रवेश गरेर शुक्रबार विहान १० बजेदेखि मध्यान्ह १२ बजेसम्म नाराबाजी र प्रदर्शन गरेका थिए ।

उनीहरुले वीरगञ्ज उपमहानगरपालिका कार्यालयविरुद्ध नाराबाजी गरी कार्यालयको पुत्ला दहन गरे ।

सीमाक्षेत्रमा फोहर फालिएको भन्दै भारत रक्सौलका स्थानीयले प्रदर्शन गरेको इनर्वा प्रहरी चौकीले जनाएको छ ।

दसगजा क्षेत्रमा उपमहानगरपालिकाले दैनिक ट्याक्टरमा ल्याएर फोहर फालेको बताएपनि उपमहानगरपालिकाले फोहोर नेपाली भूमिमा यसअघि फालिंदै आएको ठाउँमा फालिएको स्पष्ट पारेको छ ।
भारतीयको प्रदर्शनमा भारतीय सिमा सुरक्षाबल एसएसबीले समेत सघाएको देख्दा स्थानिय आश्चर्यचकित भएका छन् ।

भारतीयले नेपाली भूमिमै आएर प्रदर्शन गर्दा नेपाली सुरक्षाकर्मी र प्रशासन मुकदर्शक बनेकोमा स्थानियले चिन्ता व्यक्त गरेका छन् ।