काठमाडौं सडक विस्तारमा ढिलाइमा आर्थिक चलखेल !

Posted on: October 27, 2016 | views: 380

११ कार्तिक, काठमाडौं ।

त्रिपुरेश्वर–कलंकी–नागढुंगा १२ किलोमिटर 'किमि' सडक विस्तारले संसदको विकास समितिमा मंगलबार ठूलै चर्चा पायो । कान्तिपुर दैनिकमा समाचार छ।

समितिका सभापति रवीन्द्र अधिकारीले समितिमा भने, ‘सिंहदरबारबाट नागढुंगा पुग्न दिल्ली पुग्नुभन्दा पनि बढी समय लाग्छ ।’ भौतिक पूर्वाधार तथा यातायात मन्त्रालय र सडक विभागका प्रतिनिधिमाझ अधिकारीले यसो भनेका थिए ।
 
अधिकारीको नेतृत्वमा एक वर्षयता पटक–पटक बसेको समितिको बैठकले सरकारी निकायलाई छिटो सडक निर्माण गर्न निर्देशन दिँदै आइरहेको छ । तर विस्तारको गति भने निकै सुस्त छ । सवारी साधनहरू उपत्यकाबाट बाहिरिने र भित्रिने नाकामध्ये सबभन्दा व्यस्त नाका हो– नागढुंगा ।

 ‘यो सडक खण्डसँगै काठमाडौं उपत्यकाका अन्य बेहाल सडकबारे दैनिक गुनासो आउने गर्छन्,’ हेलो सरकारका उपसचिव प्रद्युम्नप्रसाद उपाध्यायले भने, ‘हामीले गुनासालाई सम्बन्धित निकायमा पठाउँदै आएका छौं ।’

स्थानीय र आम जनता मात्र होइन, यातायात व्यवसायीले समेत दसैंअघि भौतिक पूर्वाधार तथा यातायात मन्त्रालयमै गएर उक्त सडक खण्ड सुधार गर्नुपर्ने माग राखेका थिए । ‘यो सडकमा गाडी गुड्न सक्ने स्थिति नै छैन । त्यसैले हामीले अरू केही गर्न नसके पनि ठूला खाल्डोमा ग्राबेलसम्म हाल्न आग्रह गरेका थियौं,’ नेपाल यातायात व्यवसायी राष्ट्रिय महासंघका महासचिव सरोज सिटौलाले भने ।  

त्रिपुरेश्वर–कलंकी–नागढुंगा १२ किमि त्रिभुवन राजपथअन्तर्गतको सडक खण्ड हो । राजमार्ग ऐन, २०३३ अनुसार सडकको शून्य विन्दुबाट दुवैतिर २५/२५ मिटर दूरी हुनुपर्ने हुन्छ । त्यहीअनुसार यो खण्डको सडक विस्तार गरिएको हो । सडक विस्तार गर्न उपत्यका विकास प्राधिकरणले राजमार्गको जग्गा मिचेर बनाइएका भवन भत्काउँदै आएको छ ।