बालबालिका बढ्ने विद्यालयमा बम पड्काउने पक्राउ

Posted on: October 21, 2016 | views: 308

५ कार्तिक, काठमाडौं ।
काठमाडौं र ललितपुरका विद्यालयमा बम पड्काएर धम्क्याउँदै चन्दा असुल गर्न खोज्ने दुईजना एक महिनापछि पक्राउ परेका छन् ।

गत असोज ४ गते काठमाडौं र ललितपुरका १० वटा स्कुलमा एकसाथ बम पड्काउने योजनाकारलाई प्रहरीले १२ घण्टाको अपरेशनपछि समातेको जनाएको छ ।

प्रहरीका अनुसार सहयोगी ४ जना यसअघि नै पक्राउ परेपनि मुख्य योजनाकार ठानिएका मीन देवकोटा भन्ने विनोद थापा र माओवादी कम्युनिष्ट केन्द्रका महासचिव भनिएका केशव दाहाललाई प्रहरीले पक्राउ गरेको छ ।

असोज ४ गते उपत्यकामा बम बड्काएपछि मुख्य योजनाकार मध्येका मीन देवकोटा भन्ने विनोद थापा र बम विष्फोट गराउने योजनाकार भनिएका माओवादी कम्युनिष्ट केन्द्रका महासचिव केशव दाहाल फरार भएका थिए ।

थापाले फोनै गरेर बम विष्फोट आफूहरुले गराएको जिम्मा लिएपछि अपराध महाशाखा र काठमाडौं परिसरको संयुक्त टोलीले उनीहरुको खोजीलाई थप तीव्र पारेको थियो ।

प्रहरीले पक्राउ परेका दुवैजना काभ्रेको सिमथलीबाट उनिहरुलाई पक्रेको हो । दोलालघाटबाट करिब चार घण्टाको पैदल यात्रामा पुगिने सो गाउँमा थापा र दाहाल लुक्न सक्ने सम्भावित ६ वटा घरको सूची प्रहरीले तयार पारेर गएको प्रहरीको विशेष टोलीले उनिहरुलाई पक्रेको हो ।

अपराध महाशाखाका डीएसपी रमेश थापाको नेतृत्वमा २० जनाको टोलीले विद्यालयमा बम पड्काएर भागेको अभियुक्तहरुलाई पक्रेको हो ।

बुधबार राति करिब साढे १ बजे प्रहरीले एकसाथ ती ६ वटै घरमा अपरेशन गर्दा दाहाल र थापा पक्राउ परेको र उनीहरु पक्राउ परेको घर थापाका काकाको भएको बताइएको छ ।

प्रहरीका अुनसार दुबैजना सिन्धुपाल्चोकबाट करिब एकसाता अघि काभ्रे पुगेका थिए । बम विष्फोटपछि सञ्चार माध्यममा फोन गरेर घटनाको जिम्मा लिएपछि थापा र दाहाल दुबैले मोबाइल बोक्न छाडेका थिए ।

प्रहरीले आफन्तको सहायताबाट उनिहरुलाई पक्राउ गरेको जनाएको छ । यस्तै प्रहरीका अनुसार सिन्धुपाल्चोक, दोलखा र काभ्रेका विकट गाउँमा लुक्दै बस्दै आएका उनिहरुले राती सुत्दा समेत गार्डको रुपमा सेन्ट्री राख्ने गरेका थिए ।

गाउँमा नयाँ मान्छे आएको सूचना दिन राति ११ बजेसम्म सेन्ट्री राख्ने गरेका उनिहरु बिहान ४ बजेनै उठेर जंगलतिर गएर लुक्ने गरेको पाइएको प्रहरीले बताएको छ ।

पक्राउ परेकाबाट प्रहरीले लिएको सूचना अनुसार दशैं, तिहारजस्ता चाडपर्व नजिकिएसँगै चन्दा उठाउने योजना बनाउन भदौ २५ गते माओवादी कम्युनिष्ट केन्द्रका अध्यक्ष भनिएका देवेन्द्र सिंह महतको नेतृत्वमा बैठक बसेको थियो ।

काठमाडौं परिसरका एसएसपी बिक्रम सिंह थापाका अनुसार टोखास्थित महतको कोठामा बसेको बैठकमा ९ जना सहभागी थिए । सोही बैठकले विद्यालयमा बम राख्ने योजना बनाएको प्रहरीको दाबी छ ।

एसएसपी थापाले पत्रकार सम्मेलनमा भने, ‘विद्यालयलाई आतंकित बनाए सजिलै पैसा असुल गर्न सकिने उद्देश्यसहित यिनीहरुको योजना बनेको देखिन्छ र त्यही अनुसार सबैले कामको जिम्मेवारी बाँडफाँड गरेका थिए ।’

राति १२ बजेदेखि बम राख्ने योजनाअनुसार हरेक ठाउँमा कमाण्डर छुट्याइएको थियो । बौद्ध क्षेत्रको नेतृत्व शंकर लाखे र चन्द्रबहादुर तामाङले गरेका थिए ।

प्रहरीका अनुसार १५ जनाभन्दा बढी मान्छे एकसाथ बम राख्न परिचालित भएका थिए । उनीहरुले असोज ४ गते विहानपख दुई बजे नै तोकिएका सबै विद्यालयमा बम राखिसकेपछि महतसहित मुख्य योजनाकारहरु काठमाडौं छाडेर भागेका थिए ।

बम राख्न आवश्यक विष्फोटक पदार्थ र सिलिण्डरको व्यवस्था मुस्ताकिम अन्सारीले गरेका थिए ।

घटनाका मुख्य योजनाकार महतसहित बम बनाउने र राख्ने अन्य दुईजना भने अझै फरार छन् ।

एसएसपी थापाका अनुसार बम विष्फोटका योजनाकार महासचिव भनिएका केशव दाहाल आठौं पटक समातिएका हुन् । ०६६ सालमा सुरेन्द्र लम्साललाई अपहरण गरेर तीन करोड फिरौती मागेको अभियोगमा समातिएयता उनी बम विस्फोट, गैंडाको खाग र चितुवाको छाला तस्करी लगायत काण्डमा ७ पटक पक्राउ परेर नेताको सोर्स फोर्स लगाउँदै छुट्टै आएका थिए ।

प्रहरीले यो समुहसँग हातहतियार पनि हुनसक्ने भन्दै थप अनुसन्धान अघि बढाएको छ । साथै प्रहरीले पक्राउ परेकामाथि हदैसम्मको जन्म कैद दाबी सहित मुद्दा तयार गर्ने र संगठित अपराध अन्तर्गत मुद्दा चलाउने बताएको छ ।