पाकिस्तानको निहुँमा भारतले नेपाली सीमामा दुख दिन थाल्यो

Posted on: October 14, 2016 | views: 298

२८ असोज, वीरगन्ज ।
सिमा क्षेत्रमा पाकिस्तानसँग विवाद बढेपछि भारतले त्यसको तनाव र दुख नेपाललाई दिन थालेको छ ।

भारतीय पक्षले नेपाल भारत सीमाको दशगजा क्षेत्र तथा नाकामा सुरक्षा व्यवस्थाका नाममा नेपालबाट भारत जाने नेपालीमाथि अनावश्यक चेकजाँच र कडाइ गर्न थालेको छ ।

खुला सीमाको फाइदा उठाउँदै आपराधिक समूहको घुसपैठ हुनसक्ने बहाना बनाएर भारतीय सुरक्षाकर्मीहरुले भारतबाट निर्वाध नेपाल आउन दिएपनि नेपालबाट जानेहरुमाथि भने दुख दिन थालेको हो ।

बारा जिल्लाको सीमा क्षेत्रमा पर्ने भारततर्फका आदापुर, घोडादाना, घोडासहाय लगायतका नाकामा सुरक्षा व्यवस्था कडा पार्नुका साथै चारपाङ्ग्रे सवारीसाधनमा रोक लगाउनुका साथै पैदल यात्रीमाथि निगरानी र चेकजाँच बढाएको छ ।

दशजगा क्षेत्रमा भारतीय सुरक्षाकर्मीले बिरामी बोकेको तथा जन्ती बोकेका गाडी बाहेकका सम्पूर्ण गाडी आवतजावतमा रोक लगाएको छ ।

यसैगरी, पर्साको भारतीय सीमाका रक्सौल—भिस्वा, परसौनी—भेलाई, सिर्सिया—रक्सौला, जानकीटोल—इनर्वा, ठोरी—भिस्वाठोरी नाकामा समेत भारतीय सुरक्षाकर्मीले उस्तै दुख दिन थालेका छन् ।