बडा दशैंको टिका दिनभरनै शुभ, पूर्णिमा सम्मपनि प्रशाद ग्रहण

Posted on: October 11, 2016 | views: 596

२५ असोज, काठमाडौँ ।
नेपालीहरूको सबैभन्दा ठूलो चाड बडादशैंको मूख्य दिन आज घरघरमा टीका जमरा लगाएर आशिर्वाद थाप्ने काम भइरहेको छ ।

बिहान ८ बजेर ४५ मिनेटमा दशैंको टिकाको उत्तम साइत भएपनि दिनभरनै टिका लगाउन मिल्ने भन्दै नेपाल पञ्चाङ्ग निर्णायक समितिले आर्शिवाद र टीका लगाउन साइत नचाहिने बताएको छ ।

हिन्दु धार्मीक ग्रन्थ अनुसार असत्यमाथि सत्य र आशुरीशक्तिमाथि दैवी शक्तिको विजयको प्रतीकका रुपमा मनाइने विजयादशमीको टिकाको दिनलाई सबैभन्दा महत्वपूर्ण दिन र चाडको रुपमा मान्ने गरिन्छ ।

पञ्चाङ्ग निर्णायक समितिका अनुसार देवी विसर्जनको साइत भने बिहान ८ बजेर २५ मिनेट रहेको थियो ।

आश्विन शुक्ल दशमीका दिनमा मनाइने विजयादशमी पर्व आज हर्षोल्लासका साथ मान्यजनबाट दुर्गा भवानीको प्रसादस्वरुप टीका, जमरा ग्रहण गरेर मनाउने गरिन्छ ।

विजयादशमी आफैँमा शुभ दिन भएकाले आज टीका लगाउन सामान्य मानिसले साइत खोज्नु पर्दैन ।

आफ्ना मान्यजनहरूबाट दुर्गाको प्रसादका रुपमा टीका ग्रहण गर्दा घटस्थापनामा राखिएको पहेँलो जमरालाई समृद्धिको प्रतीकस्वरूप कान तथा शिरमा सिउरने गन्छि ।

दशैंमा प्रयोग गर्ने विधि अनुसार उमारेको जमराले विभिन्न रोगव्याधमा औषधिका रुपमा काम गर्ने तथ्य वैज्ञानिकरुपमा समेत पुष्टि भइसकेको छ ।

घटस्थापनाका दिन स्थापना गरिएको पूर्ण कलशको जलबाट अभिषेक गरी आज मान्यजनबाट टीका र प्रसाद लगाउने गरिन्छ ।

त्रेतायुगमा आजैका दिन भगवान् रामले असत्यको प्रतीकको रुप लिएका रावणमाथि विजय प्राप्त गरेकाले त्यही समयदेखि विजयादशमी मनाउन सुरु गरिएको धार्मिक कथन रहि आएको छ ।

दसैँ घर तथा पूजा कोठामा विधिपूर्वक राखिएको जमरा आजैका दिन देवी पूजा विसर्जन गरी निकालेपछि पूर्ण घडाको जलले अभिषेक गरी आफ्ना मान्यजनबाट टीका र जमरा लगाइन्छ ।

बडा दशैंको टिकाको दिन आज आफ्ना गुरु पुरोहित, हजुरबा हजुरआमा, बा आमा, मान्यजन तथा ठूलाबडाको हातबाट नवदुर्गा भवानीको टीका, जमरा तथा प्रसाद थापी आशिर्वाद लिने चलन रहि आएको छ ।
मान्यजनले यश, ऐश्वर्य वृद्धि, काम गर्ने क्षमतामा वृद्धि एवम् दीर्घायु प्राप्त होस् भनी आशीर्वाद दिने गर्दछन् ।

आजदेखि कोजाग्रत पूर्णिमाका दिनसम्म मान्यजनबाट दुर्गाको प्रसादस्वरुप टीका, जमरा र आशीर्वाद थाप्न हिँड्ने प्रचलन समेत रहेको छ ।

पहिलो पटक बिवाह गरेका जोडीहरुले आजै दशैंको टिकाकै दिन ससुरालीमा टिका थाप्ने प्रचलन पनि रहि आएको छ । यस बाहेक दशैंको शुभ दिनमा बिवाह गर्नको लागि समेत साईत नचाइने बताइन्छ ।

यस्तै विदेशमा रहेका लाखौं नेपालीहरुले पनि सामुहिक तथा साथिभाई र आफन्त जम्मा भएर बडा दशैं मनाईरहेका छन् ।

बैदेशीक रोजगारी, अध्ययन तथा व्यवसायको लागि बिदेशमा रहेका दशौं लाख नेपालीहरु काममा समय मिलाएर शुभ साईत तथा बिहानै र आज दिनभर समेत टिका लगाएर दशैं मनाउने गर्दछन् ।