आज बडा दशैंको महानवमी, दुर्गा भवानीको पूजा आजा गरिंदै

Posted on: October 10, 2016 | views: 293

२४ असोज, काठमाडौं ।
बडा दशैंको आज महानवमी पर्व । आश्विन शुक्ल नवमीका दिन मनाइने महानवमी पर्व आज हर्षोल्लासका साथ दुर्गा भवानीको पूजाआराधना गरेर मनाईदैछ ।

आज विशेषगरि दुर्गाभवानीलाई पुजा आजा सहित बलि दिने प्रचलन रहेको छ । महानवमीका दिनमा गरिने दुर्गा पूजा लगायतका कार्य गरी घटस्थापनाका दिनमा राखिएको जमरा विभिन्न शक्तिपीठमा लगी चढाइने गरिन्छ ।

दशैंघर र कोतलगायत राज्यका विभिन्न देवी मन्दिर र शक्तिपीठमा बोका, हाँस, कुखुरा र राँगाको बलिसहित दुर्गा भवानीको विशेष पूजा आराधना र दुर्गा सप्तशती एवम् देवीस्तोत्र पाठ गर्ने गरिन्छ ।

पशुबलि नदिनेहरुले भने आज कुभिन्डो, घिरौँला, मूला, काँक्रो र जटा नरिवलसमेत बलि दिई पायस पनि चढाउने गर्दछन् । अधिकांश स्थानमा महाष्टमीको दिनमा बलि दिने र महानवमीका दिनमा मार हान्ने गरिन्छ ।

मार्कण्डेय पुराणमा उल्लेख भएअनुसार महानवमी तिथिकै दिन चामुण्डा देवीले रक्तवीज राक्षसलाई वध गरेकाले महानवमी पर्वलाई विशेष महत्वका साथ लिइन्छ । कतिपय शक्तिपीठमा भने आज हाँस, कुखुरा, बोका, भेडा र राँगाको पञ्चबलि दिने गरिन्छ ।

महानवमीका अवसरमा कोतहरुमा हर्षबढाइँका साथ कोतपूजा र निशानापूजा पनि गरिन्छ । यस अवसरमा हनुमानढोका दरबारका साथै नेपाली सेनाका ब्यारेक र गुल्महरुमा बाजागाजासहित जङ्गी निशान पूजा र कोतपूजा गरिन्छ ।

आज बिहान हनुमानढोकामा सरकारको तर्फवाट ५४ बोका र ५४ राँगाको बलि दिइएको छ ।

हनुमानढोका दरबारमा रहेको वर्षमा एकपटक मात्र खुल्ने तलेजु भवानीको मन्दिर पनि आजकै दिन सर्वसाधारणको लागि खुल्ला भएको छ ।