दशैंको पाँचौंदिन कुमार कार्तिकेयकी माता स्कन्दमाताको पुजा गरिंदै

Posted on: October 05, 2016 | views: 333

१९ असोज, काठमाडौं ।
नेपालीहरुको महान चाड बडादशैंको पाँचौ दिन आज पनि देशभरका दुर्गा देवीको मन्दिरमा पूजाआजा गर्ने भक्तजनहरुको घुइँचो लागेको छ ।

दशैंको पाचौं दिन कुमार कार्तिकेयकी माता स्कन्दमाताको पूजाअर्चना गरिंदैछ । बडा दशैंको ९ दिनसम्म हरेक दिन छुट्टाछुट्टै देवीको पूजा गर्ने चलनअनुसार हिजो श्वेतवर्णकी स्कन्दमाताको पूजा गरिएको हो ।

काठमाडौं उपत्यकाका भद्रकाली, नक्साल भगवती, शोभा भगवती, मैतीदेवी लगायतका शक्तिपीठहरुमा विहानैदेखि भक्तजनहरुको घुइंचो लागेको छ ।

त्यस्तै काठमाडौं उपत्यका बाहिरका पाथिभरा, पलान्चोक भगवती, छिन्नमस्ता, दन्तकाली, जलपादेवी, छत्रेश्वरी, मनकामना, बागेश्वरीलगायतका शक्तिपीठहरुमा पनि विहानैदेखि दुर्गा भवानीको पूजा अर्चना भैरहेको छ ।

दशैंको पाँचौं दिन काठमाडौंको टेकुस्थित पचली भैरवको पूजा गरी जात्रा मनाउने परम्परा पनि रहँदै आएको छ ।