भारतसँगको असमान गण्डक सम्झौता बिरुद्ध जनजागरण अभियान

Posted on: September 29, 2016 | views: 442

१३ असोज, नवलपरासी ।
नवलपरासीका गण्डक बाँध प्रभावित समुदायले गण्डक सम्झौताको बिरोधमा यसको पुनरावलोकनको माग राख्दै जनजागरण अभियान सुरु गरेका छन् ।

गण्डक सम्झौताअनुसार भारतीय पक्षले ३२ हजार क्युसेक पानी लैजाने तर नेपाली पक्षले एक हजार २१६ क्युसेक मात्र पानी पाउने उल्लेख छ ।

यसैगरी जलविद्युत्तर्फ नवलपरासीमा तीन मेगावाट मात्र विद्युत् उत्पादन गर्ने विद्युत् उत्पादन गृह छ तर भारतीय पक्षले पूर्व नहरबाट मात्र ३५ मेगावाट विद्युत् उत्पादन गर्ने विद्युत् उत्पादन गृह चलाउँदै आएको छ ।

यसरी नेपाली पक्षलाई क्षति हुने गरी भएको सम्झौताको तत्काल पुनरावलोकन गरी नेपाली पक्षलाई हित हुने गरी नयाँ सम्झौता गर्नुपर्ने जलअभियानकर्मी बद्री सुवेदीले बताउनुभयो ।

गण्डक बाँधबाट प्रभावितको सङ्गठन गण्डक नदी नियन्त्रण सङ्घर्ष समितिको अगुवाइमा प्रभावितले जिल्लाबाट सुरु गरेको जनजागरण अभियान नारायणी नदीका जलाधार क्षेत्र रहेका मुख्य स्थानमा गरी यही असोज १६ गतेसम्म चल्ने छ ।

नवलपरासीबाट सुरु गरिएको अभियान मुस्ताङको जोमसोम, कास्कीको पोखरा, बागलुङ, म्याग्दी र पर्वतको कुश्मामा हुने गण्डक नदी नियन्त्रण सङ्घर्ष समितिका अध्यक्ष रामवरण केवटले बताउनुभयो ।