पैसाको लागि काठमाडौंका बिद्यालयहरुमा बम आतंक, दुई ठाउँमा विस्फोट

Posted on: September 20, 2016 | views: 482

४ असोज, काठमाडौं ।
विद्यालय बसमा आगलागी गरेकालाई प्रहरीले पक्राउ गर्दा प्रशासनले सामान्य धरौटिमा छाड्दा काठमाडौंका विद्यालयहरुमा मंगलबार बम विस्फोट भएका छन् ।

यसअघि पक्राउ परेर छुटेकाहरुको समुहबाटै राजधानीका विभिन्न विद्यालयमा मंगलबार विहान बम फेला परेको छ भने दुई ठाउँमा विस्फोट भएको छ ।

विभिन्न राजनीतिक दलको विद्यार्थी संगठनको नाममा विद्यालयहरुबाट चन्दा उठाएर खान पल्केकाहरुले भनेजति चन्दा नदिएकै कारण र चन्दाको लागि आतंक मच्चाउन बौद्धको आकाशद्धिप बोर्डिङ स्कुल र मनकामना उच्च माबिमा बम बिष्फोट गराएका छन् ।

बालकालिकालाई ढाल बनाएर बमको आतंक सिर्जना गराई यसरी बम विस्फोट गराउने पार्टी वा दल किटानी नभइसकेपनि नेत्र विक्रम चन्द विप्लव नजिकको विद्यार्थी संगठनले यस्तो उपद्रो गरेको ठानिएको छ ।
यद्यपी मंगलबारको बम विष्फोटमा कुनै मानवीय क्षति भने हुन पाएन ।

वम विस्फोटबाट आकाशद्धिप स्कुलको गेटमा क्षति पुगेको छ । विष्फोटमा संलग्न भएको आशंकामा प्रहरीले दुई जनालाई पक्राउ गरेको छ ।

काठमाडौं प्रहरी प्रमुख विक्रमसिंह थापाका अनुसार बम राखिएको स्थानमा अखिल नेपाल राष्ट्रिय स्वतन्त्र बिद्यार्थी केन्द्रको पर्चा भेटिएको छ र पक्राउ परेकाहरु पनि तिनै विद्यार्थी संगठन निकटका रहेका छन् ।

राजधानीको बौद्धस्थित राई स्कुल, इस्टपोल स्कुलमा शंकाष्पद बस्तु फेला परेको छ । त्यस्तै ललितपुरको रेडियन्ट स्कुलमा प्रेसरकुकर बम भेटिएको प्रहरीले जनाएको छ ।

डल्लुमा रहेको कञ्चनजंघा स्कुलमा प्रेसर कुकर बम फेला परेको थियो । सेनाको बम डिस्पोजल टोलिले उक्त बम निष्क्रिय पारेको छ ।

अखिल नेपाल राष्ट्रिय स्वतन्त्र बिद्यार्थी केन्द्र र योङ कम्युनिष्ट फोर्स नेपालको संयुक्त अपिल नामक पर्चामा वार्षीक २ लाख ४० हजार भन्दा कम आय भएका नागरिकका बालबालिकालाई निजी विद्यालयमा निशुल्क पढाउन, नीजि विद्यालयले सरकारी पाठ्यपुस्तक अनुसार अध्ययन अध्यापन गराउनुपर्ने, विद्यालयले तोकेको स्थानबाट मात्र ड्रेस पुस्तक लगायत सामाग्री ल्याउने पर्ने अवस्था अन्त्य गर्न माग गरेको छ । देखावटी रुपमा गरिव जनताको पक्षमा यस्ता माग राखेपनि यि संगठनहरुले निजि विद्यालयबाट चन्दा लिनु एकमात्र उदेश्य रहँदै आएको छ ।

साउन पहिलो साता विद्यार्थीहरु लिन डल्लु पुगेको आइडियल मोडल स्कुलको बसमा एकबिहानै आगजनी भएको थियो । उक्त घटना पछि यही संगठनले काठमाडौं सहित देशभरका निजि विद्यालयबाट करोडौं रुपैयाँ चन्दा उठाएको बताइन्छ ।

अखिल नेपाल राष्ट्रिय स्वतन्त्र विद्यार्थी केन्द्र तथा योङ कम्युनिष्ट फोर्स नेपाल नाम दिएका दुवै संगठन नेत्र विक्रम चन्द नेतृत्वको माओवादी विद्यार्थी संगठनको नाम हो ।

याव्सन लगायतका संस्थासँग संस्थागत रुपमै मागपत्र राखेर चन्दाको लागि दबाव वढाइरहेको बेलामा यस्तो बिस्फोट भएपनि प्याव्सन, एनप्याब्सन र उच्च माध्यमिक विद्यालय संघ हिसान संयुक्त बैठक बसेर आफ्नो अडान स्पष्ट पार्दैछन् ।

स्मरणीय छ स्कुल बस जलाएको आरोपमा प्रहरीले निर्मल मगर र चन्द्रबहादुर तामाङलाई पक्राउ गरेपनि उनिहरुलाई छाड्न नेत्रविक्रम चन्द माओवादीले माग र दवाव दिएको थियो ।
उनिहरु सामान्य धरौटिमा काठमाडौं जिल्ला प्रशासनबाट केही दिनमै छुटेका थिए ।

शंकास्पद बस्तु रहेका विद्यालयमा सेनाको बम डिस्पोजल टोलीले बम निष्क्रिय बनाएको छ । बम विस्फोट बारे अनुसन्धान भइरहेको प्रहरीले जनाएको छ ।

विष्फोट भएको स्थानमा फेला परेका पर्चामा नीजि विद्यालयहरुले आफ्ना मागहरु सम्बोधन नगरेको उल्लेख छ । स्मरणीय छ यस्ता विद्यार्थी संगठन र दलहरुले राजनीतिक माग अघि सार्दै विद्यार्थी हकहितका कुरा देखाएपनि अन्तिममा आर्थिक लेनदेनमा पुगेर बिरोध मत्थर पार्दै आएका छन् ।

दशकौंदेखी काँग्रेस, एमाले, माओवादी, राप्रपा वा अन्य साना दलका विद्यार्थी संगठनले विद्यार्थी हकहितका माग राख्दै आन्दोलन गरेको भनेपनि त्यस्ता विद्यालयबाट मोटो रकम लिएपछि मौन रहँदै आएका छन् । चन्दाका नाममा आफुले मागेजति रकम नदिएको खण्डमा भने त्यस्ता विद्यार्थी संगठनहरुले निजि विद्यालयहरुले विद्यार्थी लुटेको भन्दै अभिभावकका हकहितका कुरा उठाएर धोका दिंदै आइरहेका छन् ।