लाखे नाचमा आएका एक युवा नारायणीमा बेपत्ता, बन्दिपुरे टोली फर्कियो

Posted on: September 16, 2016 | views: 416

३१ भदौ, चितवन ।
पाचौं राष्ट्रिय लाखे नाच प्रतियोगितामा भाग लिन भोजपुरबाट आएको टोलीमध्यको एक बेपत्ता भएका छन् । नारायणी नदिमा नुहाउन गएका उनलाई नदिले बगाउदाँ बेपत्ता भएका हुन् ।

धरान घर भई हाल  काठमाडौं बस्ने १८ बर्षीय  सौगात मोक्तान लाई नारायणी नदिले बगाउदाँ बेपत्ता भएको र खोजी कार्यभइरहेको जिल्ला प्रहरी कार्यालय चितवनका प्रहरी प्रमुख बसन्त कुवरले जानकारी दिनुभयो ।

हिजोबाट शुरु भएको लाखे नाचको प्रतियोगितात्मक कार्यक्रम आज हुदैंछ । प्रतियोगितामा ३२ टोलीबीच प्रतिस्पर्धा हुने मुल संयोजक निर्जनलाल श्रेष्ठले जानकारी दिनुभयो ।

लाखे नाच आज पनि जारी
चितवनको नारायणगढमा हिजो सुरु भएको पाँचौँ राष्ट्रिय लाखे नाच प्रतियोगिता २०७३ आज पनि जारी छ । प्रतियोगितामा मोरङ, सुनसरी, खोटाङ, उदयपुर, धादिङ, तनहूँ, चितवन, गुल्मी, दाङलगायतले विभिन्न जिल्लाबाट ३२ समूह सहभागी भएका छन् । सहभागीहरुमध्ये बिहीबार १६ समूहले प्रतिष्पर्धा गरेका छ्न भने बाँकी समूहले आज ९शुक्रबार० प्रतिष्पर्धा गर्दैछन् ।

प्रतियोगितामा पहिलो हुने समूहलाई ७५ हजार रुपैयाँ, दोस्रो हुनेलाई ५० हजार रुपैयाँ, तेस्रो हुनेलाई २५ हजार रुपैयाँ र सान्त्वना हुनेलाई १० हजार रुपैयाँ पुरस्कारको व्यवस्था समेत गरिएको छ । प्रतियोगिता सम्पन्न गर्नको लागि १५ लाख ३४ हजार रुपैयाँ खर्च हुने आयोजकको अनुमान रहेको छ । प्रतियोगिताको उद्घाटन एमालेका नेता एवंम पूर्वप्रधानमन्त्री झलनाथ खनालले गर्नुभएको थियो ।

उपाधी दाबेदार बन्दिपुरे टोली सहभागि नभई फर्कियो
चौथो जिल्ला स्तरीय लाखे नाच प्रतियोगितामा प्रथम भएको बन्दिपुरको टोली राती नै फर्किएको छ । आयोजकको निमन्त्रणामा राती ८ बजे चितवन आइपुगेको टोली प्रतियोगितामा नाम दर्ता गर्न नपाएपछि फर्किएको हो ।

टोलीका एक पुरेन्द्र श्रेष्ठले आयोजक आफैले बोलाएर नामै दर्ता गर्न नमानेपछि आफुहरु बस्नुको औचित्य नभएर फर्र्किएको बताउनुभयो । यसबारेमा लोक संस्कृति संरक्षण तथा राष्ट्रिय लाखे नाच प्रतिष्ठान नेपालका अध्यक्ष राजेन्द्र कुमार पियासंग सम्पर्क गर्दा केही जवाफ दिन चाहनुभएन ।

लोक संस्कृति संरक्षण तथा राष्ट्रिय लाखे नाच प्रतिष्ठान नेपालको आयोजनामा लाखे नाच हुन थालेको हो । कार्यक्रमको हिजो एक कार्यक्रमका बीच एमाले बरिष्ठ नेता झलनाथ खनालले उद्घाटन गर्नुभएको हो ।