पशुपतिमा भारतीय पुजारी हटाउन खोज्ने प्रचण्ड पशुपति पुर्ननिर्माण भारतलाई दिंदै

Posted on: September 09, 2016 | views: 503

२४ भदौ, काठमाडौं ।
यिनै पुष्पकमल दाहाल उर्फ प्रचण्ड हुन जसले पशुपतिनाथ मन्दिरमा रहँदै आएका भारतीय पुजारी हटाएर नेपाली राख्न भन्दै हटाउने । तर समय फेरिएको छ । उनै प्रचण्ड अहिले देशको प्रमुख मन्दिरको रुपमा मानिने पशुपतिनाथ मन्दिर पनि भारतलाई पुर्ननिर्माण गरिदिन विन्ति गरिरहेको छ ।

पवित्र पशुपतिनाथ मन्दिर क्षेत्र पुनर्निर्माणमा छिमेकी मुलुक भारतले चासो दिँदै आएको बेलामा प्रधानमन्त्री प्रचण्डले आशन्न भारत भ्रमणमा सम्झौता सहित पुर्ननिर्माणको जिम्मा भारतलाई दिने भएका छन् ।

संस्कृति पर्यटन तथा नागरिक उड्डयन मन्त्रालयले पशुपतिनाथ क्षेत्र पुनर्निर्माणबारे भारतसँग एमओयूलाई भ्रमणको एजेण्डा बनाउन प्रस्ताव गरेको छ ।

पुरातत्व विभाग र पशुपति क्षेत्र विकास कोषको स्वीकृति लिएर एमओयूको मस्यौदालाई अन्तिम रुप दिइएको छ ।

तर, परराष्ट्र, अर्थ र कानुन मन्त्रालयको सहमति आउन बाँकी छ । ‘अबको केही दिनमा तीनवटै मन्त्रालयको सहमति आएमा प्रधानमन्त्रीको भारत भ्रमणका क्रममा दुई देशबीच एमओयू हुने देखिएको छ ।

पशुपतिनाथ क्षेत्रको पुनर्निर्माणमा भारतले लामो समयदेखि चासो दिँदै आएको छ ।

केही वर्ष पहिले आर्कोलोजिकल सर्भे अफ इण्डियाको प्राविधिक टोली आएर अध्ययन पनि गरेको थियो । मन्दिर प्रवेश गर्ने पूर्व पट्टिको सिँढीमा समस्या देखिएपछि नेपालले नै भारतीयलाई बोलाएको थियो । तर, भारतीय टोली आउँदा यहाँ काम भइसकेको थियो ।

त्यो टोलीले मुल मन्दिर क्षेत्रको पनि अवलोकन गरेर फर्कियो । भारतमा बीजेपी सरकार बनेपछि एएसआईका टोली फेरि नेपाल आएर  मूल मन्दिर क्षेत्रको फोटोग्राफीसहित अध्ययन गरेको थियो । त्यसयता भारतले पशपुति क्षेत्रको आवश्यक पुनर्निर्माणमा लगातार चासो दिँदै पुर्ननिर्माण जिम्मा आफुलाई दिन राजनीतिक प्रभाव समेत प्रयोग गर्दै आएको छ ।

मुल मन्दिरसहित कोर एरियाबाहेक बाँकी क्षेत्रको पुनिर्निर्माणको जिम्मा  भारतलाई दिने बताइएपनि यसको यकिन भइसकेको छैन ।

यसबारे प्रधानमन्त्री प्रचण्डको भारत भ्रमणका क्रममा हुने सम्झौता पछि मात्र खुल्ने छ ।

सुरक्षा, गोपनियता लगायतका दृष्टिले देशको प्रमुख मन्दिर क्षेत्र आफैंले बनाउनुपर्नेमा प्रचण्ड सरकार पशुपतिनाथ जस्तो पवित्र मन्दिर समेत भारतलाई बनाउन विन्ति गर्दै जिम्मा दिन लागि पर्नाले हालको सरकारको नियत र देशप्रतिको जिम्मेवारी छताछुल्ल भएको संस्कृतिविद्ध तथा राजनीतिक विश्लेषकहरुले टिप्पणी गर्न थालेका छन् ।

स्मरणीय कुरा त के छ भने दुई वर्षअघि नेपाल भ्रमणका क्रममा भारतीय प्रधानमन्त्री नरेन्द्र मोदीले पशुपति क्षेत्रका लागि २५ करोड भारु दिने घोषणा गरेपनि उक्त रकम अझैसम्म दिएका छैनन् ।