माओवादीले लुटेका एसएलआर ओडारमा, स्याउबारीमा गोली र म्यागजिन

Posted on: September 05, 2016 | views: 245

२० भदौ, जुम्ला ।
द्धन्द्धकालमा तत्कालिन बिद्रोही माओवादीले सरकारी सुरक्षा फौजसँग लुटेका अत्याधुनिक हतियारहरु जुम्लामा बेवारिसे अवस्थामा भेटिन थालेका छन् ।

जुम्लाको दुई छुट्टा छुट्टै गाविसमा अत्याधुनिक हतियार एसएलआर बन्दुक र त्यसमा लाग्ने म्यागजिन सहित गोलीहरु बरामद गभएका छन् ।

गत भदौ १५ गते अञ्चल प्रहरी कार्यालयको टोलीले हतियारसहित पक्राउ गरेका तीन जनाले अनुसन्धानको क्रममा बन्दुक र गोली रहेको स्थानबारे जानकारी दिएपछि एसएलआर हतियार बरामद गरिएको प्रहरीले जनाएको छ ।

जुम्लाको सनीगाँउ ४ स्थित जलजला लेकको ओडारमा हरियो प्लास्टिक र कपडाले बेरेर राखेको अवस्थामा १ थान एसएलआर राइफल तथा धापा ६ घोडेङ्गा स्थित स्याउको बगैँचाबाट एसएलआरको गोली २५ राउण्ड, १ थान म्यागजिन र पुर्जाहरु प्रहरीले बरामद गरेको छ ।

प्रहरीले बरामद हतियार एक दशक लामो द्धन्द्धका समयमा बिद्रोही माओवादीले प्रयोग गरेको आशंका गरेको छ । हतियार प्रयोग गर्न मिल्ने अवस्थामा रहेको प्रहरीले बताएको छ ।