तीजको अघिल्लो दिन आज दर खाईदै

Posted on: September 03, 2016 | views: 442

१८ भदौं, काठमाडौं ।
हरितालिका तीजको अघिल्लो दिन आज दर खाईदै छ ।
विभिन्न मिष्ठान्न परिकारका साथ आज साँझ तथा मध्यरातको समयमा दर खाने चलन रहि आएको छ ।

विशेषगरि भोली पानी पनि नपिइ निराहार ब्रत बस्ने हुनाले हिन्दु नारीहरुले मध्य रात दर खाएर भोलीको लागि ब्रत बस्ने गर्छन् ।

तीज मनाउन माइतमा भेला भएका चेलीबेटीलाई माइतीहरुले खिर, ढकनी, हलुवा, विभिन्न मिठाई तथा दुध घ्यूबाट बनेका मिष्ठान्न परिकार दरका रुपमा खाने चलन रहि आएको छ ।

तीजका दिन दिनभर निराहार व्रत बस्नका लागि पुग्ने गरी भाद्र शुक्ल द्वितीयाका दिन दश पटक खाने चलन छ । द्वितीयाका दिन मध्यरात १२ बजे पछि भाद्र शुक्ल चौथीका दिनसम्म बिहान गणेश पूजा गरी सूर्यलाई अघ्र्य दिएर मात्र ब्रतालु महिलाहरुले खाने कुरा गर्ने गर्दछन् ।

स्वास्थ्यकर्मीहरुले दर खाँदा स्वास्थ्यमा प्रतिकुल प्रभाव पार्ने झिलिमिली बजारका खानेकुरा भन्दा घरमै बनाइएका स्वस्थ खानेकुरा खान सुझाव दिएका छन् ।

साथै बढी चिल्लो, पिरो, रंग मिसाईएका खाना नखान तथा बृद्ध, सुत्केरी, विरामी महिलाहरुले पनि ब्रतको समयमा पानी तथा फलफुल खानुपर्ने भन्दै स्वास्थ्यलाई ध्यान दिन आग्रह गरेका छन् ।