नेपाल–भारत प्रबुद्ध व्यक्ति समूहले ठोस एजेण्डा र कार्यतालिका बनाउने

Posted on: July 05, 2016 | views: 268

२१ असार, काठमाडौं ।
नेपाल–भारत प्रबुद्ध व्यक्ति समूहको पहिलो बैठकले आगामी छलफलका ठोस एजेण्डा तय गर्ने भएको छ । हिजोदेखि सुरु भएको संयुक्त बैठकमा सन् १९५० को नेपाल–भारत शान्ति तथा मैत्री सन्धि’ ले प्रवेश पाएको छ ।

दुई देशबीचका सन्धि सम्झौता र सम्बन्ध पुनरावलोकनका लागि आ–आफ्नो सरकारलाई सुझाव पेस गर्न गठित समूहको राजधानीमा सुरु दुईदिने बैठकको पहिलो दिन नेपाली पक्षले विवादित सन्धिमाथि छलफल अघि सारेको हो ।

आज त्यसमा थप छलफल हुनेछ । सबै एजेण्डालाई चार भागमा विभाजन गरेर छलफल भइरहेको नेपाली विज्ञ समुहका सदस्य निलाम्बर आचार्यले जानकारी दिनुभयो । उहाँका अनुसार राजनीतिक, आर्थिक सांस्कृतिक र प्रशासनीक एजेण्डाभित्र सबै विषयलाई छलफल गरिएको छ । आज आगामी बैठकको मिति र छलफलका ठोस एजेण्डा तय गरेर छलफल सकिनेछ ।

बैठक पछि आजै दिउँसो पत्रकार सम्मेलन गरेर निर्णय सार्वजनिक गरिनेछ । बैठकको सुरुमा भारतीय पक्षले खास सन्धि सम्झौतामा केन्द्रित नभई समग्रमा कुरा राखेको थियो । नेपाली पक्षले भने एउटै मात्र सन् १९५० को सन्धिको नाम किटान गरी छलफलका लागि प्रस्ताव गरेको थियो ।

पछिल्ला दिन दुई देशबीच बढेको असमझदारी हटाई विश्वास निर्माण गर्नुपर्नेतर्फ बैठकमा नेपालले भारतीय पक्षको ध्यानाकर्षण गरेको थियो । पूर्वपरराष्ट्रमन्त्री भेषबहादुर थापाको संयोजकत्वमा नेपाल तर्फको समूहमा अख्तियार दुरुपयोग अनुसन्धान आयोगका पूर्व प्रमुख आयुक्त सूर्यनाथ उपाध्याय, सांसद राजन भट्टराई, पूर्वकानुनमन्त्री नीलाम्बर आचार्य रहेका छन् ।

भारतद्वारा गठित प्रबुद्ध व्यक्ति समूहमा नेपालका लागि भारतीय पूर्वराजदूत जयन्त प्रसाद, जवाहरलाल नेहरू विश्वविद्यालयका प्राध्यापक महेन्द्र पी। लामा, भारतीय जनता पार्टीका उपाध्यक्ष भगतसिंह कोस्यारी र बिसी उप्रेती हुनुहुन्छ । आजको बैठक बिहान १० बजेबाट सुरु हुनेछ ।