के भयो नेपाल भारत प्रबुद्ध समुहको बैठकमा ?

Posted on: July 04, 2016 | views: 408

२० असार, काठमाडौं ।
नेपाल–भारत प्रबुद्ध समूहको पहिलो बैठक आज काठमाडौंमा शुरु भएको छ ।

बैठकको उद्घाटन गर्नुंहुदै उपप्रधान एवं परराष्ट्र मन्त्री कमल थापाले नेपाल र भारतबीच अहिलेसम्म भएका सबै सन्धि सम्झौताका बारेमा समयानुकुल पुनरावलोकन गर्नु पर्ने बताउनु भयो ।

परराष्ट्र मन्त्री थापाले दुई देशबीचको सम्बन्ध अझै बलियो बनाउन प्रबुद्ध समुहको बैठकमहत्वपूर्ण हुने बताउनु भयो ।

उहाँले दुवै मुलुकलाई लाभ हासिल हुनेगरी संयुक्तरुपमा काम कसरी अगाडि बढाउने र आपसी सम्बन्धलाई अझ मजबुत बनाउने विषयमा बैठकबाट उपयुक्त सुझाव आउने अपेक्षा गरिएको बताउनु भयो ।

कार्यक्रममा प्रबुद्ध समुहका नेपालका संयोजक डा। भेषबहादुर थापाले दुईदेशबीचको सम्बन्धलाई नयाँ ढंगबाट विस्तार गर्न बौद्धिक समुहकोे छलफलले आधार तयार गर्ने बताउनु भयो ।

यसैगरी प्रबुद्ध समुहको भारतका संयोजक भगत सिंह कोसियारीले नेपाल र भारतबीचमा रहेको सम्बन्धलाई अझै बलियो बनाई एउटा असल छिमेकीका रुपमा कसरी रहन सक्छौ भन्ने विषय अहिले महत्वपूर्ण रहेको बताउनु भयो ।

नेपाल र भारतका चार चार जना कुटनितिज्ञहरु रहेको प्रबुद्ध समुहको बैठक आज र भोली दुईदिनसम्म काठमाडौंमा चल्ने छ ।

प्रबुद्ध समुहलाई नेपाल र भारतबीचमा विभिन्न समयमा भएका सन्धी सम्झौताहरुको पुनरावलोक गरी प्रतिवेदन बुझाउन दुई वर्षको समयसिमा दिइएको छ । प्रबुद्ध समुहको बैठक पालैपालौ नेपाल र भारतमा बस्ने प्रावधान रहेको छ ।