भारतीय दूतावासको लापरवाही, विरामी अम्बर गुरुङलाई दियो श्रद्धाञ्जली

Posted on: June 06, 2016 | views: 959

काठमाडौं,जेठ २४ । वरिष्ठ संगीतकार अम्बर गुरुङको स्वास्थ्य अवस्था जटिल भन्दै गईरहेको बेला भारतीय राजदूतावासले ट्विटरमार्फत श्रद्धाञ्जली दिएको छ ।  काठमाडौंको ग्राण्डी अस्पतालमा उपचार गराइरहेका संगीतकार अम्बर गुरुङको निधन भएको हल्लासँगै भारतीय राजदूतावासले श्रद्धाञ्जली दिएको हो । महीनादिन अघिमात्र भारतमा उपचारपछि फर्कनुभएका गुरुङ रोगले च्यापेपछि हप्तादिन अघि अस्पताल भर्ना हुनुभएको छ। उहाँको निधनको हल्ला आज विहान देखि नै फैलिएको थियो ।  भारतीय दूतावासले त्यसको पृष्टिनै नगरि सोमबार दिउँसो पौने २ बजे राखिएको ट्विटर स्टाटसमा भारतीय दूतावासले लेखेको छ ' भारतीय दूतावास प्रसिद्ध नेपाली संगीतकार श्री अम्बर गुरुङको दुखद् निधनप्रति श्रद्धाञ्जली ब्यक्त गर्दछ।' दूतावासले यो स्टाटस पोस्ट गरेको केहीबेरमा नै डिलिट गरेको छ। अन्ननलीमा समस्या, श्वासप्रश्वासमा जटिलता, मधुमेह तथा उच्च रक्तचाप लगायत समस्याले ग्रसित गुरुङ राष्ट्रिय गानका सङ्गीतकार उपचाररत हुनुहुन्छ ।