कर्मचारीको चुनावको लागि आज सार्वजनिक बिदा

Posted on: May 31, 2016 | views: 359

१८ जेठ, काठमाडौं ।
निजामति कर्मचारीहरुको आज हुने आधिकारिक ट्रेड युनियन निर्वाचनको सम्पूर्ण तयारी पूरा भएको निर्वाचन कार्यालयले जनाएको छ । निर्वाचनकै कारण सरकारले आज सार्वजनिक बिदा समेत दिएको छ ।

विभिन्न जिल्ला सदरमुकाम तथा तोकिएका निर्वाचन क्षेत्रहरुमा बुथ निर्माण र सम्बन्धित निर्वाचन अधिकृतहरुलाई मतपत्र वितरण गर्ने काम पुरा भएको प्रमुख निर्वाचन अधिकृत गीता प्रसाद तिम्सिनाले जानकारी दिनुभयो ।

निर्वाचन अधिकृत तिम्सिनाका अनुसार १६ सय ३ जना निजामति कर्मचारी र १२ सय १५ जना सुरक्षाकर्मि गरि २ हजार ८ सय १८ जना कर्मचारी निर्वाचनमा खटिने छन ।

निर्वाचनमा नेपाल निजामति कर्मचारी संगठन, नेपाल निजामति कर्मचारी युनियन 'संघ', नेपाल राष्ट्रिय कर्मचारी संगठन, नेपाल मधेसी निजामति कर्मचारी मञ्च, राष्ट्रिय स्वतन्त्र कर्मचारी मिलन केन्द« र नेपाल राष्ट्रसेवक कर्मचारी संगठनले मनोनयन दर्ता गराएका छन् ।

निर्वाचनमा देशभरका गरि ५५ हजार ३ सय २९ जना मतदाता कर्मचारी रहेको निर्वाचन कार्यालयले जनाएको छ ।

आज बिहान ९ बजेदेखि ५ बजेसम्म मतदान गर्ने कार्यतालीका तय गरिएको कार्यालयले जनाएको छ ।

निर्वाचनलाई लक्षित गरेर सरकारले आज निजामती कर्मचारीलाई विदा दिने निर्णय गरेको हो ।