चक्काजामको नाममा तोडफोड गर्ने २०२ अराजक पक्राउ

Posted on: May 26, 2016 | views: 479

१४ जेठ, काठमाडौं ।
यातायात व्यवसायीले आज गरेको चक्काजामको तोडफोडमा संलग्न २०२ जनालाई प्रहरीले पक्राउ गरेको छ ।

प्रहरी प्रवक्ता प्रहरी नायब महानिरीक्षक माधवप्रसाद जोशीका अनुसार चक्काजामको अवधिमा छ सवारी साधन तोडफोड भएका छन् । व्यवसायीले देशभर चक्काजाम गर्ने भने पनि काठमाडौँ उपत्यका बाहिर तोडफोड र पक्राउको घटना नभएको प्रवक्ता जोशीले जानकारी दिनुभयो ।

ट्राफिक नियम उल्लङ्घन गर्नेलाई यही जेठ १ गतेदेखि लागू हुने गरी जरिवाना शुल्क अत्यधिक वृद्धि गरिएको भन्दै नेपाल राष्ट्रिय यातायात व्यवसायी महासङ्घलगायत यातायात व्यवसायी सम्बद्ध सङ्घसंस्थाले आज सार्वजनिक सवारी साधन नचलाई विरोधमा उत्रिएका हुन् ।
आज देशभर सार्वजनिक यातायात बन्द गराउँदा सर्वसाधारण जनताले ठूलो सास्ती ब्यहोर्नु परेको छ ।

यातायात व्यवस्थापन सम्बद्धहरुले जरिवाना शुल्क स्वभाविक भएको र ट्राफिक नियमलाई स्वअनुशासनको रुपमा लिन आग्रह गर्दै आएका छन् ।

यातायात व्यवस्था विभागले आज विज्ञप्ति प्रकाशन गरि संसदद्वारा स्वीकृत भई लागु भएको जरीवाना परिवर्तनको विषयका सन्दर्भमा आपसी समन्वय, सरसल्लाह एवं वार्ताबाट नै समस्याको निकास हुने एवं जरीवानामा नै नपर्ने क्रियाकलाप सञ्चालन गरि अनुशासित मर्यादित एवं सम्मानजनक पेशाको रुपमा विका गर्न सम्बद्ध सबै पक्षलाई वार्ता रसहकार्यका लागि आग्रह गरेको छ ।