बुढिगण्डकी आयोजना बजेट अभावले रोकिन्न-प्रधानमन्त्री ओली

Posted on: May 25, 2016 | views: 425

१२ जेठ, काठमाडौं ।
प्रधानमन्त्री के.पी. शर्मा ओलीले बुढिगण्डकी जलविद्युत आयोजनाको निर्माणलाई सरकारले उच्च प्राथमिता दिएकाले बजेटको अभावले निर्माण कार्य नरोकिने र स्थानीयबासीलाई चाँडै जग्गाको मुआब्जा उपलब्ध गराइने बताउनु भएको छ ।

बुढिगण्डकी जलविद्युत आयोजना अघि बढाउने विषयमा गोरखा र धादिङका सांसदहरु, आयोजना सरोकार समितिका प्रतिनिधिहरुसहितको बैठकमा प्रधानमन्त्री ओलीले पैसाकै कारण आयोजना नरोकिने प्रतिवद्धता व्यक्त गर्नुभयो ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको छलफलमा सरकारले आयोजना चाँडो अघि बढाउनुपर्ने, चित्त बुझदो ढंगबाट स्थानिय वासिन्दालाई जग्गाको मुआब्जा उपलब्ध गराउनुपर्ने र आयोजना वरिपरि रिंगरोड निर्माण गर्नुपर्ने माग आएको नेकपा एमालेका सांसद राजेन्द« पाण्डेले जानकारी दिनुभयो ।

१२ सय मेघावाट विद्युत उत्पादन क्षमताको यस आयोजना निर्माणका लागि करिब २ सय ६० अर्ब रुपियाँ लागत लाग्ने र आयोजना सम्पन्न हुन ८ वर्ष लाग्ने अनुमान गरिएको छ ।

राष्ट्रिय गौरवको यस बुढिगण्डकी जलविद्युत आयोजना निर्माणका लागी सरकारले आयोजना क्षेत्रमा जग्गा किनबेच रोक्का गरिसकेको छ ।