सरकारका मन्त्री नै कृश्चियन धर्मको प्रचारमा !

Posted on: May 01, 2016 | views: 174

काठमाडौं,बैशाख १ । क्रिश्चियन धर्मावलम्बीले ‘क्रिसमस डे’मा सार्वजनिक बिदाको माग गर्दै आन्दोलन सुरु गरेका छन् । संविधानमा धर्मनिरपेक्षता लागू गरेपछि नेपालका क्रिश्चियन संघ–संस्थाले सरकारलाई दबाब दिन केही दिनदेखि आन्दोलन गर्दै क्रिसमस डेलाई राष्ट्रिय पर्वको रुपमा मनाउन जबरजस्ती माग तेस्र्याएका हुन् ।

सरकारले हालै मन्त्रिपरिषदको निर्णयबाट क्रिसमस डेमा क्रिश्चियनहरुलाई मात्र बिदा दिने निर्णय गरेपछि नेपालमा क्रियाशील इसाईहरू आक्रोशित बनेर आन्दोलनमा लागेका छन् । यसैगरी, चितवनलगायत विभिन्न जिल्लामा सञ्चालित बालगृहमा रहेका बालबालिकालाई क्रिश्चियन धर्मको प्रचार गर्न क्रिश्चियन शिक्षा दिएको पाइएको छ ।

हालै जिल्ला प्रशासन र महिला विकास कार्यालयले गरेको अनुगमनमा बालबालिकालाई पढाउने नाममा क्रिश्चियन शिक्षा दिने गरेको भेटिएको हो ।

चितवनमा मात्रै ३२ वटा बालगृहमा रहेका करीव एक हजार बालबालिकालाई क्रिश्चियन धर्म प्रचारका लाग पढाउने गरेको पाइएपछि प्रशासन कार्यालयले त्यस्ता बालगृहलाई सचेत गराएको छ ।गरिव र अशिक्षाको फाइदा उठाउँदै जबरजस्ती क्रिश्चियन धर्म लाद्ने प्रयास पछिल्ला दिनमा निकै बढेको छ ।

गणतन्त्र आएपछि राजनीतिक स्वतन्त्रताको फाइदा उठाउँदै केही पश्चिमा राष्ट्रका संघ संस्था क्रिश्चियन धर्म प्रचारका लागि डलरको खोलो बगाइरहेका छन् । सरकारको दुर्नियत एवम् निरीहताकै कारण ०६३ पछि पचासौँ गुणा चर्चको संख्या थपिए । धर्मनिरपेक्षताको आडमा चर्चहरू खुल्ने र सोझा विपन्न नेपालीलाई यसमा आबद्ध गर्ने प्रवृत्ति पछिल्लो दिनमा ह्वात्तै बढ्यो ।

एक तथ्याङ्कअनुसार तेस्रो जनआन्दोलनपछि मात्र देशभरिमा थप आठ हजार चर्च स्थापना गरिएका छन् । यसमा हजारौँ सोझासाधा नेपाली नागरिकलाई अनेक प्रलोभन र आश्वासन दिएर अबद्ध गरिएको हो ।

यसका लागि ठूलो धनराशी खर्च गरिएको छ । क्रिश्चियन धर्म प्रचारका लागि अहिले विभिन्न रेडियो, टीभीमार्फत अनेक कार्यक्रम सञ्चालन गरी भ्रम फैलाउने प्रयास भइरहेको छ । नेपालमा रहेका अधिकांश एफएम रेडियो, टीभीलगायतका मिडियाबाट यशु खिष्टबारे प्रवचन दिने, अन्य धर्मभन्दा क्रिश्चियन धर्म नै उत्कृष्ट भएको भ्रमपूर्ण प्रचार गर्ने गरिएको छ ।

सरकारले जबरजस्ती धर्म परिवर्तन गर्न लगाउनेलाई कारबाही गर्न नसक्दा क्रिश्चियनहरुले अवान्छित चलखल गर्ने मौका पाएका हुन् ।

सरकारका मन्त्री एकनाथ ढकालमाथि त धर्म प्रचारका लागि आफ्नो एनजीओमार्फत विदेशबाट डलर ल्याई विभिन्न चर्च र यससम्बन्धी अभियानमा खर्च गर्ने गरेको आरोप पहिलादेखि नै लाग्दै आएको छ । ढकालले क्रिश्चियन धर्म प्रचारका लागि आएको पैसा पोसेर मन्त्री पद हत्याएको चर्चा पनि चल्दै आएको छ । घट्ना र विचार साप्ताहिकमा खबर छ ।