छोरी सँस्थाको सहयोगमा कागजको गहना बनाउने तालीम प्रदान

Posted on: December 03, 2018 | views: 184

नुवाकोट । महिला तथा बालबालिकाको क्षेत्रमा कार्यरत छोरी सँस्था, नुवाकोटले कमजोर तथा जोखिममा परेका किशोरीलाई कागजको गहना बनाउने तालीम दिएको छ ।

जोखिममा परेर अहिले छोरी सँस्थाको आवास गृह र किशोरी मैत्री कार्यालय विदुरको संरक्षणमा रहेका किशोरीलाई कागजबाट गरगहना बनाउने तालीम दिएर दक्ष बनाइएको छोरी सँस्थाका जिल्ला अधिकृत अरुणा लामाले जानकारी दिनुभएको छ ।


गएको सोमबारदेखि सुरु भएर आज सम्पन्न भएको तालीममा सहभागी भएका १६ जना किशोरीलाई छोरी सँस्थामा आबद्ध प्रशिक्षक निर्जला बस्नेतले कागजको प्रयोग गरी जुम्का, माला, औठी, रिङ, ब्रास्लेट लगायतका आकर्षण गहना बनाउन सक्ने बनाउनुभएको हो । तालीमको क्रममा सहभागीहरुले कागजलाई कैची र स्केलको प्रयोग गरी हस्तकला मार्फत बनाएका गरगहना निर्माण गरी व्यवसायिक रुपमा गहना बनाउन सक्ने रुपमा प्रस्तुत भएका थिए ।

छोटो समयको तालीम मार्फत पनि खेर गएका कागजको प्रयोग गरी आकर्षण गहना बनाएर फुर्सदको समयमा आम्दानी गर्न सक्ने भएको सहभागिले बताएका छन् । जोखिम तथा कमाजोर बर्गका किशोरी भएकाले उनीहरुलाई छोरी सँस्था मार्फत आश्रय दिएर विभिन्न सीपमूलक तालीमा मार्फत स्वरोजगार बनाउने क्रममा कागजको प्रयोग गरी गहना बनाउन सक्ने बनाएर आगामी दिनमा आर्थिक रुपमा आत्मनिर्भर हुन सक्षम भएको सस्थाले जनाएको छ ।

तालीममा सहभागिहरुले आगामी दिनमा तयार गर्ने गहनालाई सँस्थाले विक्री गरी आयआर्जन बृद्धि गराउन सहयोग पु-याउने जनाएको छ ।