अबैध डलर बोकेर केरुङ जान लागेका दुई जना समातिए

Posted on: November 18, 2018 | views: 355

धुञ्चे । रसुवाको गोसाईकुण्ड गाउँपालिका वडा नं ६ धुन्चेबाट श्रोत नखुलेको एकसय दरका २८६ थान गरी  २८ हजार ६ सय अमेरिकी डलर सहित २ जनालाई रसुवा प्रहरीले पक्राउ गरेको छ ।

     पक्राउ पर्नेमा चितवन रत्ननगरका ५३ वर्षीय श्रीराम चौधरी र रौतहट गरुडाका ३२ वर्षीय बिकाश चौधरी रहेका छन् । उनीहरूमध्ये श्रीरामको साथबाट १ सय दरका २ सय ६८ थान गरी २६ हजार ८ सय अमेरिकी डलर बरामद भएको छ । यसैगरी उनको साथमा रहेको सुनको सिक्री ४ थान समेत प्रहरीले बरामद गरेको छ । यस्तै,  बिकासको साथबाट १ सय दरका १८ थान गरी १ हजार ८ सय अमेरिकी डलर प्रहरीले बरामद गरेको जनाएको छ ।

रसुवाभन्दा बाहिर स्थायी बासोबास गर्दै आएको भएपनि उनीहरुले यसअघि रसुवामा बसाई सराई गरी रसुवा नागरिक भएको आधारमा केरुङ प्रवेशको अनुमति पत्र समेत बनाएको रसुवा प्रहरीले जनाएको छ ।
धुन्चेस्थित त्रिशूली खोला पुल नजिकै जिल्ला प्रहरी कार्यालयबाट खटिएको प्रहरीले काठमाडौंबाट टिमुरेतर्फ जाँदै गरेको पर्यटक बोक्ने गाडी बा.१ य १४४६ नम्बरको स्कारपिओ जाँच गर्ने क्रममा अबैध रकम सहित उनीहरुलाई पक्राउ गरेको जनाएको छ ।

दुवैजनालाई कारबाहीको लागी राजश्व अनुसन्धान कार्यालयमा बुझाउने रसुवा प्रहरी प्रमुख सन्तोष तामाङले जानकारी दिएको छ ।