नुवाकोटको प्रतिनिधिसभा क्षेत्र नं १ को चार करोड बजेट बिनियोजन गर्न सुझाब संकलन

Posted on: November 12, 2018 | views: 514

नुवाकोट ।
स्थानीय पूर्वाधार विकास साझेदारी कार्यक्रम अन्तरगत नुवाकोटको प्रतिनिधिसभा निर्वाचन क्षेत्र नं. १ को लागी प्राप्त भएको चार करोड रुपैयाँ बजेटको योजना तथा कार्यक्रम बनाउन छलफल भएको छ । स्थानीय पूर्वाधार विकास साझेदारी कार्यक्रमको सञ्चालन कार्यविधि नियमावली २०७५ अनुसार संयोजक रहनुभएका प्रतिनिधिसभा सदस्य हितबहादुर तामाङको आयोजनामा विदुरमा सोमबार सरोकारवालाहरुसंग छलफल गरिएको हो ।


प्रतिनिधिसभा निर्वाचन क्षेत्र नं. १ मा पर्ने प्रदेससभा सदस्य निर्वाचन क्षेत्र न. १ का प्रदेससभा सदस्य एवम् प्रदेस नं.३ का उपसभामुख राधिका तामाङ, प्रदेससभा सदस्य बद्री मैनानी,  सात वटा गाँउपालिकाको अध्यक्षहरु, जिल्ला समन्वय समितिका प्रमख र उपप्रमुखहरुसंग कार्यक्रमका संयोजक रहनुभएका प्रतिनिधिसभा सदस्य तामाङले सुझाब, योजना तथा कार्यक्रम एवम् राय संकलन गर्नुभएको हो । उहाँले आफ्नो निर्वाचन क्षेत्र भित्रका सबै सरोकार राख्नेहरुसंगको सुझाबको आधारमा जनताको माग र आवश्यकलाई प्रथामिकता दिएर तोकिएको मापदण्डको आधारमा बजेट तर्जुमा पर्ने बताउनुभयो ।


नेपाल सरकारले यसअघि सञ्चालन गर्दै आएको निर्वाचन क्षेत्र किास कार्यक्रमलाई खारेज गर्दै प्रत्यक्ष निर्वाचित सम्बन्धि निर्वाचन क्षेत्रका प्रतिनिधिसभाको सदस्य संयोजक रहने गरी यो वर्षदेखि चार करोड रुपैयाँ बजेट तर्जुमा गरी नयाँ कार्यक्रम सञ्चालनमा ल्याएको छ ।


असोज १७ राजपत्रमा सूचना जारी गर्दै बजेट कार्यान्वयन गराउन यही कार्तिक मसान्तसम्म बिनियोजन गर्न तोकिएको समयसीमा भित्र छुट्याउनुपर्ने योजनामा सबैको साझा धारणा र चाहनालाई समावेश गर्ने कार्यक्रमको संयोजक एवम् पूर्व मन्त्री समेत रहनुभएका हितबहादुर तामाङले बतताउनुभयो ।  


उहाँले अघिल्ला वर्षहरुमा कार्यक्रमको संयोजक रहेका जनप्रतिनिधिले पूर्वाग्राही राखेर योजना तर्जुमा गर्दा प्रभावकारी कम आउने गरेको प्रति आफू सचेत भएकाले अब बिनियोजन गर्न लागिएको बजेट तथा कार्यक्रममा भने कुनै पूर्वाग्रही नराखेर पादरदर्शी रुपमा जनताको अधिकतम हित हुने गरी बजेट छुट्टाउने प्रतिबद्धता जनाउनुभयो ।  


स्थानीय पूर्वाधार विकास साझेदारी कार्यक्रम अन्तरगत सुझाब संकलनको क्रममा प्रदेस न्ं .३ का उपसभामुख राधिका तामाङले बजेट बिनियोजनमा पूर्वाधार विकासको नाममा सडकलाई भन्दा पनि कृषि, शिक्षा, स्वास्थ्य लगायतको क्षेत्रमा प्रथामिकता दिनको लागी आग्रह गर्नुभयो ।


नुवाकोटबाट प्रदेससभा सदस्यको रुपमा प्रतिनिधित्व समेत गर्दै आउनुभएका पूर्व कृषि विकास राज्य मन्त्री समेत रहनुभएका तामाङले लगानी गरेको कार्यक्रमले सार्थक उपलब्धी दिनुपर्ने र त्यो दिगोपनको लागी समेत हुनुपर्ने भएकाले बजेटको आधार ठूलो बनाउन, जनतालाई प्रत्यक्ष लाभपुग्ने कार्यक्रम समावेश गर्नु सुझाब दिनुभयो ।  


यस्तै, कार्यक्रममा प्रदेससभा सदस्य बद्री मैनालीले बजेटको आकार चार करोड रुपैयाँ मात्र रहेकोमा सात वटा स्थानीयतहका प्रमुखहरुले माग गरेको कार्यक्रममा चार अर्ब भन्दा बढीको योजना समावेश भएकाले ती सबैलाई समावेश गराउन सक्ने अबस्था नभएपनि जनताको चाहना र विकास निर्माणलाई क्रमशः समावेश गराउदै लैजान सकिने गरी कार्यक्रम बनाउन सुझाब दिनुभयो । उहाँले बरु स्थानीयतह अनुसार केन्द्रित भएर कार्यक्रम बनाउन सकिने भए त्यसरी योजना बनाएर निर्वाचन क्षेत्रमा पर्ने सबै स्थानीयतहलाई अबको पाँच वर्षमा समृद्धि बनाउन सक्ने गरी योजना तर्जुमामा ध्यान दिनुपर्नेमा जोड दिनुभयो ।  

कार्यक्रममा जिसस प्रमुख सन्तमान तामाङ, उपप्रमुख अप्सरा थापा, ककनी गाँउपालिका अध्यक्ष मानबहादुर लामा, शिवपुरी गाँउपालिका अध्यक्ष रामकृष्ण थापा, पञ्चकन्या गाँउपालिका अध्यक्ष रमेश तामाङ, दुप्चेश्वर गाँउपालिका अध्यक्ष योबिन्द्रसिंह तामाङ, तादी गाँउपालिका अध्यक्ष नारायण प्रसाद पाण्डे, लिखु गाँउपालिका अध्यक्ष धुव्र श्रेष्ठ र सूर्यगढी गाँउपालिका अध्यक्ष सन्तबहादुर घलेले आफ्नो गाँउपालिका भित्र जनताको लागी तत्काल आवश्यकता रहेको ठूलो बजेट खर्चनु पर्ने योजना तथा कार्यक्रम समावेश गर्नको लागी सुझाब दिनुभएको थियो ।


कानून अनुसार निर्वाचित प्रतिनिधिसभाका सदस्यको संयोजकत्वमा गठित समितिले निर्णय गरी खर्च गर्ने स्थानीय पूर्वाधार विकास साझेदारी कार्यक्रमअन्तर्गत रुचार करोड विनियोजन गर्नुपर्ने व्यबस्था गरिएको छ ।
स्थानीय पूर्वाधार विकास साझेदारी कार्यक्रमले नदी, गल्छी, पहिरो नियन्त्रण, सडक निर्माण तथा स्तरोन्नति, खानेपानी तथा सरसफाइ, फोहोरमैला व्यवस्थापन, पर्यटकीयस्थल संरक्षण, लघु जलविद्युत्, स्वास्थ्यचौकी, प्रसूति भवन, वृद्धाश्रम, सार्वजनिक उद्यान, सभागृह, कृषि उपज सङ्कलन केन्द्र, हाटबजार व्यवस्थापनलगायत क्षेत्रमा खर्च गर्न पाउने स्पष्ट व्यवस्था गरेको छ ।


त्यस अन्तर्गत आयोजना छनोट गर्दा सम्भव भएसम्म सहभागितामूलक योजना पद्धतिबाट छनोट भएका वा सम्बन्धित गाउँसभा वा नगरसभाबाट पारित भएका योजनामध्येबाट छनोट गर्नुपर्ने कार्यविधिमा उल्लेख गरिएको छ ।
प्राप्त भएका सुझाबको आधारमा यो महिना भित्रै बजेट तर्जुको अन्तिम निर्णय हुने कार्यक्रमका सदस्य सचिव रहनुभएका जिससका समन्वय अधिकारी सच्युतराज उप्रेतीले जानकारी दिनुभयो ।
प्रतिनिधिसभा निर्वाचन क्षेत्र नं. २ को योजना तर्जु सम्बन्धि बैठक मंगलबार आह्वान गरिएको छ ।