मैलुङ–स्याफ्रुबेसी सडक खण्डको डिपिआर फेरी गर्नुपर्ने

Posted on: November 08, 2018 | views: 206

नुवाकोट । राष्ट्रिय गौरवको आयोजनाको रुपमा विस्तार भइरहेको ‘गल्छी–त्रिशूली–मैलुङ्ग–स्याफ्रुबेसी–रसुवागढी’ सडक योजना अन्तरगत मैलुङ–स्याफ्रुबेसी सडक खण्डको बिस्तृत परियोजना प्रतिवेदन (डिपिआर) फेरी तयार गर्नुपर्ने भएको छ ।


नेपाली सेनाले ट्रयाक खोल्ने काम गत चैत ३० मा पूरागरी जेठ ६ गते हस्तान्तरण गरेपछि तयार गरेको डिपिआर प्रतिवेदन बर्खाको समयमा पहिरोले क्षति पु¥याएपछि त्यसको पुनः विवरण संकलन गर्नुपर्ने भएको आयोजना प्रमुख सुबोधकुमार देवकोटाले जानकारी दिनुभयो । उहाँको अनुसार बर्खा अघिनै डिपिआर तयारगरी विश्लेषण पश्चात ठेक्काको तयारीमा रहेको सडकको हाल दर्जन भन्दाबढी स्थानमा पहिरोले क्षति पु-याएको छ ।


“तिहारपछि फेरी सुरु गरिने डिपिआरमा पहिरोले क्षति पुगेको स्थानको मात्र लगत संकलन गरिने छ ।” टप नेपाल न्यूज डटकमसंग कुरागर्दैआयोजना प्रमुख देवकोटाले भन्नुभयो “त्यसको लागी दुई साताभित्र सक्ने लक्ष्य बनाइएको छ ।”
नेपाली सेनाले विसं २०७२ बैशाख १ देखि सुरु गरेको उक्त सडक खण्ड तीन वर्ष लगाएर पूरा गरेको हो । १८ किमि दुरीको सडकको अधिकांश स्थानमा दुईलेन हुनेगरी चट्टान फोरेर ट्रयाक खोलिएको छ ।


‘गल्छी–रसुवागढी’ सडकको पृथ्वी राजमार्ग स्थित धादिङको गल्छीबाट नुवाकोटको देवीघाट–त्रिशूली–रसुवाको बेत्रावती–मैलुङ्ग–स्याफ्रुबेसी–रसुवागढीहुँदै चीनको केरुङ प्रवेशद्धारसम्म पुग्न सबैभन्दा छोटो दुरीको रुपमा यो सडक खण्डलाई लिइन्छ । यो सडकको दुरी गल्छीदेखि रसुवागढीसम्म ८२ किमि पर्दछ ।


यो सडक अन्तरगत बेत्रावतीबाट स्याफ्रुबेसी पुग्न मैलुङहुदै जादाँ धुञ्चेबाटभन्दा २४ किमि दुरी कम पर्दछ ।


आयोजना प्रमुख देवकोटाको अनुसार पासाङल्हामु राजमार्गको बेत्रावतीबाट कालिकास्थान धुन्चेहुँदै स्याफ्रुबेशीपुग्न ५३ किमी पर्छ भने बेत्रावतीबाट मैलुङहुँदै स्याफ्रुबेसी पुग्न २९ किमि दुरी मात्र पर्दछ ।  
सडक विस्तार अन्तरगत आयोजनाको समग्र काम हाल ३० प्रतिशत पूरा भएको छ ।