भारतले बनायो नेपालको सहमति बिनै सिमामा काठेपुल

Posted on: March 06, 2018 | views: 3492

दार्चुला ।

नेपालको सिमा क्षेत्रमा बल मिच्याई र सिमा अतिक्रमण गर्दै आएको भारतले महाकाली नदीमा नेपालको सहमतीबिनै काठेपुल बनाएको छ ।


भारतले बनाएको एकतर्फी बाटो तथा काठेपुलको विषयमा सोमबार बसेको बैठकमा नेपाली अधिकारीले कडा रुपमा प्रस्तुत हुँदै त्यसको बिरोध गरेका छन् । उनीहरुले भारतले नेपालका कुनै पनि निकायसँग समन्वय नगरी एकतर्फी रुपमा काठेपुल निर्माण गरेको भन्दै आपत्ति जनाएका हुन् ।


भारतीय पक्षले आफूसँंग छलफल र सहमति नगरेर काठेपुल र बाटो निर्माण गरेको भन्दै नेपाली अधिकारीहरुले भारतीय समकक्षीसँग प्रश्न उठाएका थिए ।

बैठकको सुरुमा पिथौरागढका डिएम सि रविशंकरले स्वागत मन्तव्य राख्नुभएको थियो । त्यसलगत्तै नेपाली टोलीका नेता एवं दार्चुलाका प्रमुख जिल्ला अधिकारी जनार्दन गौतमले भारतले बिना सहमति संरचना निर्माण गरेको भन्दै आपत्ति जनाएका थिए ।


आफूहरुसँग भारतीय पक्षबाट एकतर्फी निर्माण गरिएका संरचनाका फोटो र भिडियो समेत रहेको बताउदै उहाँले नेपाल सरकारको स्वीकृति बिना सीमा क्षेत्रमा संरचना निर्माण र सञ्चालन गर्न नसकिने बताउनुभयो ।


सीमा बैठकले धारचुलाको खोतिलास्थित सुख्खा पहिरो व्यवस्थापनका लागि दुवै देशका अधिकारीले प्राविधिक अध्ययन गर्ने निस्कर्ष निकालेको छ । बैठकमा सहभागी महाकाली नदी नियन्त्रण आयोजनाका प्रमुख सुशीलचन्द्र देवकोटाले लामो समयदेखि भारतीय पक्षले सुख्खा पहिरोका ढुंगा नहटाएकोमा प्रश्न गर्नुभएको थियो ।


यसअघिको छलफल र सहमति अनुसार भारतीय पक्षबाट काम नभएको प्रश्न उठाएपछि यसबारे तत्काल प्राविधिक टोलीले स्थलगत निरीक्षण गरी काम गर्ने सहमति गरिएको छ ।


सोमबार पिथौरागढमा भएको सीमा बैठकमा पिथौरागढ र दार्चुलाका अधिकारीहरुबीच यस्तो सहमति भएको हो । भारतीय पक्षले एकतर्फी रुपमा राप्लाको दुम्लिङभन्दा उत्तरतर्फको क्षेत्रमा बनाएका काठेपुल अवैध भएको र नेपालको सहमति बिना बनाइएकोमा नेपाली अधिकारीहरुले भारतीय पक्षको ध्यानाकर्षण गराएका छन् ।


भारतीय अधिकारीहरुले महाकाली नदीमा बनाइएका काठेपुलको विषयलाई नेपाली मिडियाले बढी महत्व दिएर सार्वजनिक गरेको भन्दै आपत्ति जनाएका थिए ।