घरेलु तथा साना उद्योग प्रमुख राजेन्द्रकुमार कर्ण २ लाख घुससहित पक्राउ

Posted on: March 01, 2018 | views: 1583

लहान ।

लहान जिल्लाको घरेलु तथा साना उद्योग कार्यालयका प्रमुख राजेन्द्रकुमार लाल कर्ण दुई लाख घुसा सहित पक्राउ परेका छन् ।


घुस लिँदालिँदै रंगेहात अख्तियार दुरुपयोग अनुसन्धान आयोगको टोलीले बुधबार साँझ सरकारी निवास लहानको ग्रामीण चोकबाट उनलाई पक्राउ गरेको हो ।


मानव अधिकार तथा वातावरण विकास केन्द्र होरेन्डेक लहानका एक कर्मचारीबाट लिएको दुई लाख रुपैयाँ घुससहित प्रमुख कर्ण पक्राउ परेको अख्तियार कार्यालय इटहरीका एसपी किसन सिंह थापाले जानकारी दिए ।


होरेन्डेकलाई गरिबी निवारणका लागि लघु उद्यम विकास कार्यक्रम दिएको छ । 


होरेन्डेकका एक कर्मचारीले भने, ‘कार्यक्रमका लागि घरेलुले ६० लाख बजेट छुट्याएको छ । तत्काल २० प्रतिशत रकम निकासा दिएपछि प्रमुख कर्णले कमिसन माग्दै आएका थिए ।’ कर्णले कुल बजेटको १० प्रतिशत कमिसन मागेपछि अख्तियारलाई खबर गरिएको थियो ।