नरेन्द्र मोदीले ओलीलाई फोन गरेर बधाई दिंदै भारत भ्रमणमा बोलाए

Posted on: December 22, 2017 | views: 305

भक्तपुर ।

भारतका प्रधानमन्त्री नरेन्द्र मोदीले नेकपा (एमाले) का अध्यक्ष केपी शर्मा ओलीलाई टेलिफोन गरि हालै सम्पन्न निर्वाचनमा वाम गठबन्धनले ठूलो सफलता प्राप्त गरेकोमा बधाई दिएका छन ।


बिहिबार अपरान्ह अध्यक्ष ओलीलाई भारतीय प्रधानमन्त्री मोदीले नेपालमा तीनवटै निर्वाचन सम्पन्न भएकोमा खुशी व्यक्त समेत गरेको एमाले सचिव प्रदीप ज्ञवालीले जारी गरेको बिज्ञप्तीमा उल्लेख गरिएको छ । 


अध्यक्ष ओलीलाई वधाई तथा शुभकामना दिँदै मोदीले यस सफलताले नेपालमा लोकतन्त्रलाई सुदृढ बनाएको तथा निर्वाचनमा हासिल परिणाम र गठबन्धनको जीतले नेपालमा राजनीतिक स्थायित्व कायम हुने र आर्थिक विकास हुने विश्वास व्यक्त गरेको बिज्ञप्तीमा उल्लेख छ । 


उनले नयाँ सरकार गठन लगत्तै भारत भ्रमणका लागि अध्यक्ष ओलीलाई निमन्त्रणा गर्दै आफू स्वागत गर्न आतुर रहेको र नयाँ सरकारसँग सहकार्य गर्न प्रतिक्षारत रहेको बताएका थिए ।


अध्यक्ष ओलीले मोदीलाई बधाइ तथा शुभकामनाका लागि धन्यवाद दिदै आफ्नो ध्यान स्थायित्व, लोकतन्त्रको सुदृढीकरण, सुशासन र आर्थिक विकासमा केन्द्रित रहेको बताएका थिए । यसका लागि छिमेकीहरुसँग सुसम्बन्ध कायम गरिने अध्यक्ष ओलीले बताए ।


अध्यक्ष ओलीले गुजरात लगायत प्रान्तहरुमा हालै सम्पन्न निर्वाचनमा प्राप्त सफलताका लागि मोदीलाई वधाइ दिएका थिए ।