मध्यरातबाट चुनाव प्रचार गर्न नपाईने, सामाजिक सञ्जालमा पनि रोक

Posted on: December 04, 2017 | views: 128

काठमाडौं ।

दोस्रो चरणको प्रतिनिधिसभा सदस्य र प्रदेशसभा निर्वाचनको मौन अवधि  मध्यरातबाट लागू हुँदैछ । निर्वाचन आयोगले मंसिर २१ गते ४५ जिल्लामा हुन लागेको दोस्रो चरणको चुनावको मौन अवधि मध्यराति १२ बजेबाट शुरु हुने जानकारी दिएको छ ।


मौन अवधि शुरु भएपछि मतदान नसकिएसम्म निर्वाचन क्षेत्र सहित सामाजिक सञ्जालमा समेत निर्वाचन प्रचार प्रसार गर्न र कुनै पनि माध्यमबाट भोट माग्न पाइँदैन ।


एसएमएस, भाइबर, फेसबुक लगायत कुनै पनि माध्यमबाट भोट माग्न नपाइने निर्वाचन आयोगले जनाएको छ । मौन अवधिमा चुनाव प्रचार गरेमा वा कसैले भोट मागेमा एक लाख रुपैयाँ जरिवानादेखि उम्मेदवारी रद्ध गर्नेसम्म अधिकार निर्वाचन आयोगलाई छ ।


साथै मतदान केन्द्रको तीन सय मिटर वरिपरि राखिएका आ आफ्ना निर्वाचन चिहृन र प्रचार सामग्री पनि दलहरुले हटाउनुपर्ने छ ।


सोमबार मध्यरातपछि भोट माग्न नपाइने भएकाले दलहरु आज अन्तिम दिनको चुनाव प्रचारमा व्यस्त छन् । उनीहरुलाई मतदातासम्म पुग्न भ्याइनभ्याइ छ । कांग्रेस, एमाले र माओवादीका नेताहरु आ(आफ्नो निर्वाचन क्षेत्रमा परिचालित छन् ।


दोस्रो चरणको निर्वाचनबाट १२८ र प्रदेशसभाका लागि २५६ सांसद चुनिने छन् । प्रतिनिधिसभा सदस्यतर्फ १ हजार ६६३ तथा प्रदेश सभातर्फ २ हजार ८१९ उम्मेवार प्रतिस्पर्धामा छन् । दोस्रो चरणको निर्वाचन हुने ४५ जिल्लामा १ करोड २२ लाख ३५ हजार ९ सय ९३ मतदाता छन् ।


दोस्रो चरणको चुनाव सकिएलगत्तै पहिलो चरणको चुनावको मतगणना पनि सँगसँगै हुनेछ । पहिलो चरणको चुनाव भने ३२ जिल्लामा मंसिर १० गते नै सम्पन्न भएको थियो ।