अख्तियारद्धारा अकुत सम्पत्ति थुपारेका २ सय सरकारी अधिकारीमाथि छानविन

Posted on: November 06, 2017 | views: 327

काठमाडौं ।

लोकमानसिंह कार्कीलाई महाअभियोग लगाएर हटाएपछि सुस्त देखिएके अख्तियार दुरुपयोग अनुसन्धान आयोग केही सक्रिय हुन थालेको छ ।


भ्रष्टाचार गरि अकुत सम्पत्ति आर्जन गरेको ठानिएका २ सय बढी उच्च सरकारी अधिकारीमाथि अख्तियारले विस्तृत छानविन थालेको छ ।


अवकासप्राप्त र वहालवालासहित ठूलो संख्याका उच्च अधिकारीविरुद्ध अख्तियारले अनुसन्धान थालेको हो ।


अख्तियारले सुरक्षा निकाय, सिंचाइँ, खानेपानी, सडक, भौतीक पूर्वाधार तथा यातायात, अर्थ, स्वास्थ्य मन्त्रालय सहित विभिन्न विभागका उच्च अधिकारीको सम्पत्ति छानविन थालेको हो ।


अख्तियारको अकुत सम्पत्ति छानविनमा ४० जना इन्जिनियर, २० जना सुरक्षा निकायका उच्च पदस्थ अधिकारी र पाँच जना सचिवसमेत तानिएका छन् ।


सार्वजनिक संस्थानका प्रमुखहरु सहित डाक्टरहरु समेत भ्रष्टाचारमा संलग्न भएको पाइएपछि छानविनमा तानिएका छन् ।


अख्तियार अन्तर्गतकै ‘इन्टेलिजेन्स एजेन्सी’ले दिएको रिर्पोटका आधारमा अख्तियारले छानविन थालेको हो ।


अख्तियारले आइतबार मात्र पूर्वप्रहरी प्रमुख उपेन्द्रकान्त अर्याल, सचिव गजेन्द्रकुमार ठाकुर लगायतका चार अधिकारीसँग बयान लिएको थियो । अख्तियारले ट्रान्सर्फमर खरिद काण्डमा पूर्वमूख्यसचिव राजेन्द्रकिशोर क्षेत्री, पूर्वसचिव विश्वप्रकाश पण्डित, र हालका सचिव अर्जुन कार्कीको बयान लिएको छ ।


अर्थ मन्त्रालय अन्तर्गतको राजश्व न्यायाधिकरण, भन्सार भन्सार कार्यालय, क्षेत्रीय डिभिजन कार्यालय, सडक डिभिजन, स्वास्थ्य, तत्कालिन स्थानीय निकायका अधिकारीहरू पनि छानविनमा परेका अख्तियार स्रोतले बताएको छ ।


यसअघि अख्तियारले अकुत सम्पत्ति आर्जनमा एक हजार पाँच सय सरकारी अधिकारीको नाम छानविनका लागि तयार गरेको सार्वजनिक भएको थियो । त्यसबाट नाम छोट्याएर हालका लागि २ सय भ्रष्टाचारमा संलग्न ठानिएकाहरुमाथि छानविन थालेको हो ।