काठमाडौंबाट दुई, पोखराबाट तीन भारतीय सुटर भारत सरकारले बनाएको पेस्तोल सहित पक्राउ

Posted on: November 04, 2017 | views: 486

काठमाडौं ।

आपराधिक घटनालाई दुतावासकै दबावमा दवाउने गरेका कारण नेपालमा भारत सरकारकै आपराधिक गतिविधि बढेको फेरी एकपटक पुष्टि भएको छ ।


सांसद् मिर्जा दिलसाद वेग हुन् वा जमिम शाह एवं युनुश अन्सारी हत्या सबैमा भारतीय संलग्नता पाइएपनि अनुसन्धाननै गुपचुप पार्दै आएको नेपाल प्रहरीले आफ्नै कारण यस्ता आपराधिक घटना बढाउन सहयोग गर्दै आएको घटनाक्रम बृद्धिले देखाएको छ ।


पछिल्लो पटक पाकिस्तानी दुतावासका कर्मचारीमाथि महाराजगञ्जमा कारभित्रै भएको गोली प्रहार देखी पाकिस्तानी पुर्न सैनिकको भारतीय सिमा नजिकबाट अपहरण पछि बेपत्ताको घटनाले पनि भारतले नियोजित रुपमा यस्ता आपराधिक घटनामा संलग्नता प्रत्यक्ष अप्रत्यक्ष खेलिरहेको देखिन्छ ।


यस्तै घटनाको अर्को श्रृंखला घटको छ लगातार काठमाडौं र पोखरामा ।


भारतको राजस्थानमा आतंक मच्चाएर नेपाल छिरेका ३ भारतीय सुटर पक्राउ पोखरामा पक्राउ परेका छन् । प्रहरीका अनुसार, पक्राउ परेका ३ भारतीय हप्ता असुलीदेखि हत्यासम्मका आरोपमा मुद्दा खेपिरहेका व्यक्तिहरु हुन् ।


४ भन्दा धेरैै हत्या आरोप र २५ भन्दा धेरै असुलीका मुद्दा उनीहरुमाथि रहेको प्रहरी दाबी छ ।


दुई भारतीय काठमाडौंको कमलादीबाट पेस्तोलसहित पक्राउ परेको घटना सेलाउन नपाउँदै प्रहरीले ३ भारतीय सुटरसहित १ नेपालीलाई पोखराबाट पक्राउ गरेको हो । भारतको राजस्थान प्रहरीले नेपालको केन्द्रीय अनुसन्धान व्युरोलाई उनीहरुको बारेमा जानकारी गराएर खोजी गरिदिन केही समयदेखि आग्रह गर्दै आइरहेको थियो ।

पक्राउ परेकाको परिचय भने प्रहरीले खुलाएको छैन ।

प्रहरीले उनीहरुसँगै अर्का १ जना नेपालीलाई पनि नियन्त्रणमा लिएको छ । यद्यपि, ती नेपालीको पनि परिचय खुलाइएको छैन ।


यता गाडी हतियार सहित दर्जनौं जिल्ला तथा करिव सय प्रहरीको चेकपोष्ट पार गर्दा समेत नेपाल प्रहरीले भारतीय बन्दुकधारी समाउन नसकेको रहस्य खुलासा भएको छ ।


काठमाडौं कमलादीस्थित एक डान्सबारमा बुधबार साँझ गोली प्रहार गरेपछि समातिएका दुई भारतीय नागरिकबाट बरामद हतियार अनि पन्जाब लुदियानाका जसभिर सिंह र हरवेन्द्र सिंह भारतबाटै गाडी भाडामा लिएर सुनौली नाका हुँदै मंगलबार साँझमात्रै काठमाडौं आइपुगेका थिए ।


डान्सबारभित्र बिल तिर्न भनेपछि आफु भारतीय प्रहरीभएको भन्दै धम्कीदिएर उनिहरुले पेस्तोल देखाउँदै गोली नै चलाए । लगत्तै खटिएको प्रहरीले उनिहरुलाई पक्राउ गर्न भने नागरिकको सहयोगमा सफल भयो । उनीहरूबाट प्रहरीले एउटा पेस्तोल, ५१ राउन्ड गोली र चारवटा म्याग्जिन फेला पारेको छ ।


प्रारम्भिक बयानमा दुवै जनाले भारतबाटै पेस्तोल लिएर आएको बताएका छन् । प्रहरीका अनुसार बरामद हतियार लाइसेन्सप्राप्त हो । बरामद गोलीको पनि लाइसेन्स रहेको जनाइएको छ । उनीहरूको साथबाट भारतीय प्रहरीको परिचयपत्र पनि बरामद भएको छ, जुन उनीहरुसँग सम्बन्धित छैन । हरवेन्द्रले आफू भारतस्थित विद्युत् प्राधिकरणको कर्मचारी भएको बताएका छन् । जसभिरले भने कृषि फर्म सञ्चालक भएको दाबी गरेका छन् ।


उनले पन्जाबमा आफ्नो ठूलो फार्म हाउस भएको र गत वर्ष आफूलाई गोली प्रहार भएपछि लाइसेन्स लिएर हतियार बोक्न थालेको बताएका छन् । दुवैले पहिलोपटक नेपाल आएको बयान दिएका छन् । उनिहरुको साथबाट प्रहरीले अरुकै नाममा रहेको भारतीय प्रहरीको परिचयपत्र समेत बरामद गरेको छ ।


गोली चलेको डान्सबारका सञ्चालकले भने जसभिरले आफूहरूलाई भारतीय प्रहरीका रूपमा चिनाएर तर्साएको बताएको छन् । ‘हतियार बोकेर हिँड्नु अवैध हो भन्ने जानेको छैन भन्नु बकवास हो । घटना र पक्राउ परेका भारतीयलाई संवेदनशील मान्नुपर्छु, एक उच्च प्रहरी अधिकृत भन्छन् ।


काठमाडौं प्रहरी परिसरले बिहीबार काठमाडौं जिल्ला अदालतबाट ज्यान मार्ने उद्योगमा सात दिनको म्याद लिएर अनुसन्धान अगाडि बढाएको छ ।


श्रोत अनुसार काठमाडौंबाट पक्राउ परेका यि दुईलाई छाड्न भारतीय दुतावासका कर्मचारीहरुले दबाव दिन थालेका छन् । उनिहरुले आरोपत्र फितलो बनाउन र जरिवाना तिराएर छाडिदिन प्रहरी नेतृत्वमा दबाव दिइरहेका छन् ।