अनुमतिमा लिएको हतियार पनि अनिवार्य बुझाउनु पर्ने

Posted on: November 03, 2017 | views: 182

काठमाडौँ । जिल्ला प्रशासन कार्यालय काठमाडौँले कानूनी रूपमा अनुमति प्राप्त व्यक्तिका नाममा रहेका हातहतियार कात्तिक मसान्तभित्र अनिवार्य रूपमा बुझाउन सर्वसाधारणसँग अनुरोध गरेको छ । 


कार्यालयले सुरक्षाको काममा खटिएका सुरक्षाकर्मी तथा कानूनबमोजिम लिन पाउने हतियारबाहेक अन्य कुनै पनि व्यक्तिले कुनै प्रकारका विस्फोटक, रसायनिक, विषालु पदार्थ, लाठी, खुकुरी, बन्दुक पेस्तोलजस्ता हतियार लिएर हिँड्न, प्रदर्शन गर्न वा गराउन पनि पूर्ण रूपले निषेध गरेको छ । 


प्रमुख जिल्ला अधिकारी केदारनाथ शर्माद्वारा आज जारी विज्ञप्तिमा निर्वाचन अवधिभर मदिरा तथा मदिराजन्य पदार्थको अवैध उत्पादन तथा बिक्री वितरण कार्यमा पूर्ण बन्देज लगाएको उल्लेख गरेको छ । 


आगामी मंसिर २१ गते हुने प्रतिनिधि सभा, प्रदेश सभा सदस्य निर्वाचनलाई लक्षित गरी काठमाडौँमा शान्ति सु–व्यवस्था कायम गर्न कार्यालयले उच्च शतर्कता अपनाएको जनाएको छ ।