दरबारमार्गका ठग व्यापारिको दादागिरि-'प्रहरीले बोलाउने बित्तिकै भेट्नुपर्छ भन्ने छैन'

Posted on: October 29, 2017 | views: 265

काठमाडौं ।

लत्ताकपडा, जुत्ता घडीलगायतका सामानमा चर्को मूल्य लिई उपभोक्तालाई ठगी गर्ने दरबारमार्गका ठग व्यवसायीहरू प्रहरीबाट सम्पर्कविहीन भएका छन् ।


महानगरीय प्रहरी परिसर टेकुले १३ व्यवसायीलाई कार्यालयमा उपस्थित हुन पत्र काटेपनि उनिहरुले दादागिरि देखाउँदै प्रहरीले बोलाउँदैमा नजाने बताउन थालेका छन् ।


‘थप अनुसन्धान प्रक्रियाका लागि व्यवसायीलाई पत्र काटेका थियौं,’ परिसरका डीएसपी बेलबहादुर पाण्डेले भने, ‘तर, व्यवसायीहरू फरार छन् ।’ उनका अनुसार व्यवसायीहरू पसलमा कामदार राखेर सम्पर्कविहीन भएर बसेका छन् । व्यवसायीहरू फरार भएपछि कारबाही प्रक्रिया नै प्रभावित भएको छ ।


आपूर्ति व्यवस्थापन तथा उपभोक्ता हित संरक्षण विभागको टोलीले भदौ १९ र २१ गते दरबारमार्गका पसल अनुगमन गर्दा अत्यधिक नाफा लिने गरेको फेला पारेपछि ९ वटा पसलमा सिल गरिएको थियो । दुईवटा पसलमा भने सिलबन्दी गरिएको थिएन । विभागले ती दुई लत्ताकपडा व्यवसायीलाई पनि कारबाहीका लागि सिफारिस गरेको थियो ।

टोलीले २१ गते नै न्युरोडको लत्ताकपडा पसलमा पनि अनुगमन गरेको थियो । त्यस क्रममा दुई पसललाई सिलबन्दी गरेको थियो । विभागका शाखा अधिकृत रमेश श्रेष्ठका अनुसार ती व्यवसायीसँग लिएको बयान विश्लेषण गरी परिसरमा बुझाएको थियो । विभागले अत्यधिक मुनाफा राखी बिक्री गरेको निष्कर्षसहित कालोबजार तथा केही अन्य सामाजिक अपराध तथा सजाय ऐन २०३२ अनुसार कारबाही गर्न फाइल बुझाएको थियो । विभागले पेस गरेको फाइलको आधारमा परिसरले असोज २१ गतेबाट अनुसन्धान थालेको हो । 


ती फाइलका आधारमा परिसरले पुनस् अनुसन्धान गरी दोषीलाई कारबाही गर्ने जनाएको थियो । तर, कारबाहीमा पर्ने डरले व्यवसायीहरू फरार भएका हुन् । ‘पसलमा प्रहरी पनि पठाएका थियौं,’ डीएसपी पाण्डेले भने, ‘सञ्चालकहरू फेला परेनन् ।’ व्यवसायीहरू अटेरी गर्न थालेपछि परिसरले थप कडा रूपमा प्रस्तुत हुने तयारी गरेको छ । दोस्रो चरणअन्तर्गत टेलिफोन ट्रेस गरेर प्रक्राउ गर्ने उनले बताए । ‘कालोबजारी गरेको आरोपमा फाइल दर्ता भइसकेको छ,’ उनले भने, ‘छिट्टै सम्पर्कमा नआए दोस्रो चरणअन्तर्गत फोन ट्रेस गरेर समात्छौं । यसलाई छिट्टै टुगोमा पुर्‍याउँछौं ।’

वकिलको रायअनुसार शुक्रबार कालोबजारी ऐनअनुसार परिसरमा मुद्दा दर्ता भएको जनाएको छ । व्यवसायीले पेस गरेको खरिद र बिक्री बिल हेर्दा २० प्रतिशतभन्दा उच्च मुनाफा राखेको छ । परिसरले सोही फाइलकै आधारमा कारबाही प्रक्रिया अघि बढाइने जनाएको छ । विभागका महानिर्देशक कुमार दाहालले पनि व्यवसायीहरू फरार भएको जानकारी पाएको बताए । ‘हाम्रोतर्फबाट सम्पूर्ण प्रक्रिया पूरा गरेर कारबाही गर्न प्रहरीलाई जिम्मा दिएका थियौं,’ उनले भने, ‘प्रहरीले कारबाही प्रक्रिया अघि बढाउँदा फरार भएको जानकारी पाएको छु ।’


दरबारमार्ग क्षेत्रका व्यापारीको साझा संस्था दरबारमार्ग विकास बोर्ड अध्यक्ष गोपाल सुन्दरलाल कक्षपतीले व्यवसायीहरू फरार नभएको दाबी गरे । उनले प्रहरीले भन्नेबित्तिकै भेट्नैपर्छ भन्ने जरुरी नभएको बताए । ‘व्यवसायीहरू केही कामका लागि कतै गएका हुन सक्छन् । फरार भएका छैनन्,’ उनले भने, ‘प्रहरीले भन्नेबित्तिकै भेट्नपर्छ भन्ने छैन । भेट्न अनिवार्य छैन ।’ उनले सबै व्यवसायीहरूको जिम्मा लिन नसक्ने बताए । ठगी गरेको भन्दै अनुगमन टोलीले पुमा, नाइकी, बेन्टले र स्टोर वानमा सिलबन्दी गरेको थियो । भदौ २१ गते दरबारमा पुनस् अनुगमन गर्दा छुटका नाममा व्यापारीले थप ठगी गरिरहेको फेला परेको थियो । त्यस क्रममा अनुगमन टोलीले वाच एन्ड सी, सुलक्स सेन्टर, लेबल्स स्टोर प्रालिको रिबक, लाइन्स स्टाइल इन्टरप्राइजेज प्रालिको बोसिनी, लेबल्स स्टोर प्रालिका पसल सिलबन्दी गरेको थियो ।


केही दिनयता विभागले दरबारक्षेत्रमा पुनस् अनुगमन सुरु गरेको छ । टोलीले बुधबार स्पोर्टस प्लाजा प्रालि, बिना फेसन हाउस, अपसनमा अनुगमन गरेको थियो । त्यसक्रममा पनि व्यवसायीले दर्ताअनुसार साइनबोर्ड नराखेको, दर्ता नवीकरण नगरेको फेला परेको थियो । यस्तै तीनै पसलमा लत्ताकपडाको मूल्य र बिक्री मूल्य धेरै अन्तर भएकाले अनुसन्धानका लागि बिलहरू अनुगमन टोलीले विभागमा लगेको जनाएको छ ।

टोलीले आइतबार दरबारमार्गमा अनुगमन गर्दा श्रीहनु ट्रेडर्सरजोडिकले पनि खरिद मूल्यको २० प्रतिशतभन्दा बढी मूल्य राखेर बिक्री गरेको पाइएको थियो । ती व्यवसायीलाई स्पटीकरणको लागि तीन दिनभित्र विभागमा उपस्थित हुन निर्देशन दिएको छ । ‘अनुगमन गरी केही थान अनुसन्धानका लागि विभागमा ल्याएका थियौं । प्रमाण जुटाउन थालेका छौं,’ महानिर्देशक दाहालले भने, ‘सम्पूर्ण कागजात तयार गरेर राजस्व अनुसन्धानमा पठाउँछौ ।’ अर्थ मन्त्रालयले न्यून बिजकीकरण नियन्त्रण नगर्दा बजारमा समस्या भएको उनले बताए । 


फेमेली तेललाई कारबाही भएन

तेलको पेरोक्साइड भ्यालु ११ दशमलव ५३ मिलिइक्विभेलेन्टरकिलोग्राम फेला परे पनि शिवशक्ति ब्रान्डको फेमिली तेल उद्योगलाई कारबाही हुन सकेको छैन । विभागको टोलीले दसैंअघि अनुगमन गरी सिलबन्दी गर्न खोज्दा उद्योगका सञ्चालक र कर्मचारीले अवरोधसमेत गरेका थिए ।

त्यसपश्चात् उत्पादन र कारोबार रोक्का गर्न निर्देशन दिएको थियो । त्यसपश्चात् विभागले कालोबजारी ऐनअनुसार कारबाही गर्न प्रमुख जिल्ला कार्यालय बारालाई भदौ ३० गते पत्राचार गरे पनि हालसम्म कुनै कारबाही हुन सकेको छैन ।

‘हामीले कारबाही गरी विभागलाई जानकारी गराउन पत्रचार गरेका थियौं,’ महानिर्देशक दाहालले भने, ‘तर, हालसम्म कारबाही भएको छैन ।’ कार्यालयबाट कारबाहीमा आलटाल भएपछि विभागको टोलीले पुनस् अनुगमन गरी सिलबन्दी गर्ने तयारी गरेको छ । 

साभाुर राजु चौधरी ईकान्तिपुर