बिर्तामोडमा डीएसपी सरुवा र मृतक परिवारलाई १० लाख दिएपछि स्थिति सामान्य

Posted on: October 28, 2017 | views: 439

बिर्तामोड ।

बेपत्ता बालक मृत अवस्थामा भेटिएपछि भएको उग्र प्रदर्शनमा प्रहरीको गोली लागेर एक जनाको मृत्यु भएपछि बढको बिर्तामोडको विवाद डिएसपीको सरुवा र प्रदर्शनमा मारिएका व्यक्तिको परिवारलाई १० लाख दिने सहमतीपछि सामान्य बनेको छ ।


इलाका प्रहरी कार्यालय अनारमनीका प्रमुख डीएसपी राजकुमार सिलवाललाई जिल्ला तानेपछि उनको स्थानमा जिल्ला प्रहरी कार्यालय झापाका डीएसपी जितेन्द्र बस्नेतलाई विर्तामोडमा खटाइएको छ ।


झापाको बिर्तामोडमा भएको गोलीकाण्डमा मृत्यु भएका प्रदर्शनकारी अर्जुनधारा–११ का नरेश थापाको परिवारलाई सरकारले राहत स्वरुप १० लाख रुपैयाँ दिने निर्णय गरेको छ।


शनिबार इलाका प्रहरी कार्यालय अनारमनीमा बसेको राजनीतिक दल, स्थानीय प्रशासन र पीडित परिवारबीचको बैठकले यस्तो निर्णय गरेको हो ।


यस्तै किरिया खर्च स्वरुप नगरपालिका र जिल्ला समन्वय समितिले २५/२५ हजार रुपैयाँ दिने निर्णय समेत गरेको छ ।


मृतक परिवारको सन्तानलाई अध्ययनका लागि नगरपालिकाले खर्च व्यहोर्ने समेत सहमति भएको छ । बैठकले अर्जुनधाराका ११ वर्षीय बालक लक्ष्मण शिवाकोटीको हत्याको विषयमा पीडित परिवारको माग अनुसार पुनः दुई दिन थप अनुसन्धान गर्ने निर्णय पनि गरेको छ ।


दसैंको टीकाको दिन बेपत्ता भएका अर्जुनधारा ११ का शिवाकोटीको शव त्यसको भोलिपल्ट विर्तामोड १ वैंसावाडी स्थित झाडीमा फेला परेको थियो ।


शुक्रबार भएको घट्नापछि बिर्तामोडमा लगाइएको कर्फ्यु हट्दै सामान्य बनेको छ ।