पाँचतारे होटलमा सुरक्षाकर्मीलाई मतपत्र जोगाउने तालिम

Posted on: October 27, 2017 | views: 295

काठमाडौं ।

निर्वाचन आयोगले लाखौं रुपैयाँ खर्चेर राजधानीको पाँचतारे होटेलमा चुनावमा मतपत्र जोगाउन सुरक्षाकर्मीलाई तालिम दिएको छ ।


मतपत्रको सुरक्षाबारे चारैवटा सुरक्षा निकायका अधिकारीलाई राखेर आयोगले तालिम आयोजना गरेको हो ।


राजधानीको होटल याक एण्ड यतीमा शुक्रबार विहानदेखि नेपाली सेना, सशस्त्र प्रहरी, नेपाल प्रहरी र राष्ट्रिय अनुसन्धान विभागका अधिकारीहरुलाई तालिम आयोजना गरिएको हो ।


निर्वाचन स्थलमा मतपत्रको सुरक्षा कसरी गर्ने भनेर तालिम दिइने निर्वाचन आयोगका प्रवक्ता नवराज ढकालले जानकारी दिए । ‘चुनावमा बुथ कब्जा हुने, मतपत्र च्यातिने, लुटिने लगायतका सम्भावित घटना कसरी रोक्ने भनेर तालिम दिइने छ,’ प्रवक्ता ढकालको भनाई छ ।


निर्वाचनको सुरक्षाका लागि सरकाले तीन वटा सुरक्षा घेरा बनाएको छ । सबैभन्दा बाहिरी घेरामा नेपाली सेना, बीचको घेरामा सशस्त्र प्रहरी र सबैभन्दा भित्री घेरामा नेपाल प्रहरीलाई खटाइने छ । त्यसका साथसाथै म्यादी प्रहरी र अनुसन्धान विभागको टोली पनि निर्वाचन व्यवस्थित र सूचना संकलनको लागि परिचालित हुनेछन् ।